Upieršyniu ŭ sučasnaj historyi Biełarusi raspačataja kryminalnaja sprava pa artykule «Vykarystańnie rabskaj pracy» ŭ dačynieńni da cyhanskaj siamiejnaj pary. Z 2015 hoda hetaja para vykarystoŭvała dziaŭčynu ŭ jakaści niavolnicy, paviedamlajuć «Žodzinskija naviny».
Ilustracyjny zdymak.
- Žycharka Barysava apynułasia ŭ ciažkaj žyćciovaj situacyi, — paviedamiŭ načalnik Žodzinskaha HAUS Vital Pručkoŭski. — U svoj čas jana pasvaryłasia ź siamjoj i syjšła z domu. U dziaŭčyny nie było baćki, a maci złoŭžyvała ałkaholem. U domie pražyvali ajčym, a taksama siastra razam z sužycielem, jaki raniej pryciahvaŭsia da kryminalnaj adkaznaści.
Žyć joj nie było dzie. Abstaviny skłalisia takim čynam, što ŭ chutkim časie jana apynułasia ŭ čužoj siamji. Za dach nad hałavoj i ježu jana raspłočvałasia tym, što dahladała dzieciej, prybirałasia ŭ chacie, hatavała ježu. Zatym pad psichałahičnym ciskam, vykarystoŭvajučy fizičny hvałt, jaje prymusili žabravać.
Jak raspavioŭ načalnik narkakantrolu i procidziejańnia handlu ludźmi Žodzinskaha HAUS Michaił Rohaŭ, dla jaje nadrukavali teksty z prośbaj ab materyjalnaj dapamozie nibyta chvorym svajakam. Dziaŭčynu pryvozili da kramy albo haradskoha rynku, stavili ŭ peŭnaje miesca, a sami kantralavali: što jana robić, kolki hrošaj joj dajuć. Kali nabiahała peŭnaja suma, jaje zabirali. Za niekalki hadzin u dzień jana «zarablała» ad 50 da 200 rubloŭ.
Pa vynikach apieratyŭna-vyšukovych mierapryjemstvaŭ hetyja fakty byli zadakumientavanyja. Siamiejnaja para i 25-hadovaja dziaŭčyna zatrymanyja. Pa ich miescy žycharstva kanfiskavanyja roznyja abjavy z prośbaj akazańnia materyjalnaj dapamohi.
Padčas dalejšaj pravierki było ŭstanoŭlena, što infarmacyja ŭ tekstach ab chvorych ludziach nie adpaviadaje rečaisnaści. Milicyja prosić usich, chto achviaravaŭ dziaŭčynie bolš za 50 rubloŭ, źviarnucca ŭ Žodzinski HAUS. Tady siamiejnuju paru pryciahnuć da adkaznaści jašče i za machlarstva.
