Z 1 lutaha ŭ Minsku znoŭ pačnuć vydavać usie vidy amierykanskich viz, u tym liku turystyčnyja (B1, B2). Adnak mihracyjnyja vizy pakul vydavacca nie buduć.
Pra heta zajaviŭ 30 studzienia na bryfinhu ŭ Pasolstvie ZŠA časovy pavierany ŭ spravach Złučanych Štataŭ u Biełarusi Robiert Rajli.
Padavać na vizu zmohuć tolki rezidenty Biełarusi, pakolki resursy dypłamatyčnaha pradstaŭnictva zastajucca abmiežavanymi, to zajaŭki ad nierezidentaŭ Biełarusi prymacca nie buduć.
Košt vizy roŭny 160 dalaram i jaje možna budzie atrymać na nastupny paśla padačy dzień, dadaŭ dypłamat.
«Heta iluzija, što atrymać amierykanskuju vizu ciažka: nie treba demanstravać nam bankaŭskija rachunki, dastatkova tolki dakazać suviaź ź Biełaruśsiu. Naš intares u tym, kab źmienšyć kolkaść admovaŭ, kab kožny zajaŭnik mieŭ mahčymaść pabyvać i pahladzieć na ZŠA», — padsumavali ŭ pradstaŭnictvie amierykanskaha pasolstva.
Pa słovach sp. Rajli, ciaham 2017 hoda ŭ Minsku było vydadziena kala 8 tysiač viz: heta paśla papiaredniaha pasłableńnia, kali 1 listapada paroh byŭ źnižany z 70 da 50 hadoŭ.
***
Nahadajem, što ŭ sakaviku 2008 hoda pad ciskam biełaruskich uładaŭ byŭ skaročany dypłamatyčny štat pasolstva ZŠA z 35 da 5 čałaviek. U vyniku biełarusam, kab atrymać vizu, davodziłasia źviartacca ŭ konsulskija adździeły Złučanych Štataŭ u Maskvie, Pieciarburhu, Varšavie, Kijevie, Vilni.
Sa žniŭnia 2014 hoda amierykanskaje pasolstva ŭ Minsku adnaviła vydaču vizaŭ niekatorym katehoryjam biełaruskich hramadzianaŭ — studentam, udzielnikam prahram kulturnaha abmienu, asobam, starejšym za 70 hadoŭ, a taksama tym, u kaho była viza raniej.
Z 1 listapada 2017 hoda vizy ŭ Minsku stali vydavać asobam, starejšym za 50 hadoŭ. A z 9 studzienia 2018 h. pasolstva prymała zajavy ad rezidentaŭ Biełarusi na vizy nastupnych katehoryj: A, C1/D, G, F, H, I, J, L, M, O, P i R.
