Amierykanski časopis Forbes upieršyniu apublikavaŭ rejtynh samych bahatych ludziej, jakija zarabili svaje hrošy na kryptavalutach. Usiaho ŭ śpis uvajšli 19 čałaviek. Zrešty, redakcyja časopisa adznačaje, što mahli ŭpuścić niekatoryja asoby.
Na pieršym miescy znachodzicca Krys Łarsen — suzasnavalnik kryptavalutnaj płatformy dla apłatnych sistem Ripple. Jaho bahaćcie aceńvajecca ŭ $7,5 — $8 miljardaŭ. Druhoje miesca z bahaćciem u $ 1-5 młrd zaniaŭ Džozef Łubin, zasnavalnik kryptavalutnaj płatformy ConsenSys, na trecim Čanpien Čžao — dyrektar kryptaabmiennaj biržy Binance ($ 1,1-2 miljardy).
Na čaćviortym miescy ŭ śpisie apynulisia braty-bliźniaty Tajler i Kemieran Uinkłvoss, viadomyja tym, što sudzilisia z Markam Cukierbierham z-za idei stvareńnia Facebook. ŚMI nazyvajuć ich pieršymi ŭ śviecie kryptavalutnymi miljarderami. Forbes acaniŭ ich bahaćcie ŭ $ 900 miljonaŭ- $ 1,1 miljarda.
Piaciorku zamykaje inviestar Mećju Miełłon z bahaćciem u $ 900 miljonaŭ- $ 1 miljard. Jon pačaŭ zajmacca kryptavalutami ŭsiaho hod tamu.
Dla taho, kab patrapić u ciapierašni rejtynh, treba mieć minimum $ 350 miljonaŭ, adznačajuć u Forbes.
Mienavita ŭ stolki aceńvajecca bahaćcie «samaha biednaha» ŭdzielnika rejtynhu — paŭdniovakarejca Son Čy Chiena.
