Barabannyja partyi, mocny vakał i huki elektrahitary — heta nie mietał-sejšn. Heta fiestyval chryścijanskaj muzyki «Dastukacca da niabiosaŭ». 10 lutaha na scenie DK Tekstylščykaŭ u Baranavičach vystupiła 5 muzyčnych hurtoŭ roznych chryścijanskich kanfiesij.
«Dastukacca da niabiosaŭ» — heta štohadovy chryścijanski muzyčny marafon, jaki pravodzicca ŭžo ŭ siomy raz. Upieršyniu taki fiestyval prajšoŭ u 2012 hodzie ŭ Astraŭcy. Druhi raz miescam praviadzieńnia byŭ Hudahaj, a z 2014 hoda fest arhanizoŭvajecca ŭ Baranavičach. U im udzielničajuć muzyčnyja hurty z roznych haradoŭ Biełarusi, jakija svaimi śpievami prasłaŭlajuć Boha.
Ideja zładzić taki fest u Biełarusi ŭźnikła, jak ni dziŭna, za miažoj, na adnym z padobnych chryścijanskich kancertaŭ prasłaŭleńnia ŭ Kijevie. Mienavita tam arhanizatar biełaruskaha fiestyvalu ksiondz Pavieł Rudźman zadaŭsia pytańniem, čamu takich kancertaŭ niama ŭ Biełarusi.
«My chacieli abjadnać usie chryścijanskija supolnaści — katalickija, pratestanckija i pravasłaŭnyja, tamu što nikoli nie začynialisia na inšyja kanfiesii. A jašče — «sarvać» moładź z kanapy i pryvieści ŭ vialikuju zału. My chočam, kab jany nabralisia duchu jednaści, zrazumieli, što nie adnyja, što jość inšyja ludzi siarod tych, z kim jany vučacca abo chodziać na pracu, jakija taksama vierać u Boha, i kab heta było dla ich razumieńniem, što varta štości rabić dalej u svajoj viery, raźvivacca i iści napierad», — zaŭvažaje ks. Pavieł Rudźman.
Fiestyval «dla ŭsich»
«Dastukacca da niabiosaŭ» naviedvajuć nie tolki chryścijanie, ale taksama i ateisty, jakim prosta cikava, abo jakija vypadkova zajšli pahladzieć, što tut adbyvajecca. I sami arhanizatary padkreślivajuć, što radyja vitać roznych hledačoŭ, niezaležna ad śvietapohladu, adnačasova nahadvajučy, što kožny, adnak, vybiraje sam, prychodzić na taki fest abo nie.
«Jość vierujučyja kataliki, jakija nie chočuć iści, a jość ludzi niavierujučyja, jakija chočuć zapalicca hetym ducham. Naprykład, basist hurtu The Crossway, kali tolki pryjšoŭ da nas, skazaŭ, što jon ateist i budzie hrać tolki jak muzyka, a siońnia skazaŭ mnie: «Ksiondz, dziakujučy ŭsiamu hetamu ja vieru, što Boh jość». Dla nas heta taksama vielizarnaja pieramoha», — havoryć ksiondz Pavieł Rudźman.
Na fiestyval pryjazdžaje moładź z roznych kutkoŭ Biełarusi.
«Prychodžu siudy, tamu što viedaju, što ŭ hetych śpievach vielmi hłyboki sens. Heta nie prosta śpieŭ, heta nievialikaja malitva. Taksama, kab «adarvacca» i sustrecca ź ludźmi, jakija padzialajuć maje intaresy», — havoryć udzielnik festu Vital Šleh.
«My nabrali vialikuju hrupu i pryjechali siudy, kab u pieršuju čarhu prasłavić Boha. A jašče — kab sustrecca z usimi, z kim daŭno nie bačylisia», — dzielicca studentka Jania Rudkoŭskaja, jakaja pa zaprašeńni siabrovak pryjechała na fiestyval upieršyniu.
Na pytańnie, što ŭvohule dziaŭčynie daje viera ŭ Boha, Jana z upeŭnienaściu adkazała — «luboŭ».
«Ja ŭ pieršuju čarhu znajšła luboŭ i padtrymku Boha. Jon daje ŭpeŭnienaść va ŭsim, što ja rablu, prosta błasłaŭlaje, ździajśniaje cudy, daje patrebnych ludziej… Jon sa mnoj, Jon z nami ŭsimi».
Pierapoŭnienaja zała hledačoŭ, siarod jakich prykładna 80% moładzi, madernovaje aśviatleńnie sceny, dobry huk i navat anłajn-tranślacyja na Youtube. Sioletni fest u Baranavičach uklučaŭ u siabie šmat navinak.
Na scenie vystupiła 5 hurtoŭ. Heta katalicki jevanhielizacyjny muzyčny prajekt OPEN (Hrodna), hurt Vyšejšaj duchoŭnaj sieminaryi ŭ Pinsku «Podych Duchu», NG YOUTH, The Crossway (Baranavičy) i jevanhielizacyjny prajekt «Ryby».
Hitarnyja i dram-soła, huki skrypki i spałučeńnie hałasoŭ roznych tanalnaściej, i, kaniečnie ž, chryścijanskija teksty piesień stvarali atmaśfieru. A taksama — uśmieški, tancy i aktyŭnaść hledačoŭ.
Tradycyjna, akramia vystupu muzyčnych kalektyvaŭ, prachodzili konkursy i mini-viktaryny. Udzielniki mahli vyjhrać stylovuju majku ź firmovym pryntom DDN 18, adkazaŭšy na pytańni viadučaha.
Padčas kancertu byŭ taksama arhanizavany zbor srodkaŭ na budaŭnictva centra dla dziaciej z abmiežavanymi mahčymaściami ŭ Homieli.
Usiaho fiestyval sabraŭ kala tysiačy hledačoŭ.
