U 2013 hodzie ŭ słuckuju milicyju patelefanavała minčanka i raspaviała, što niechta zalez u jaje dačny dom i skraŭ rečy. Z chaty źnikli kabiel, pras, try kuchonnyja nažy, kurtka i dva kamplekty śpiecadzieńnia. Ale zatoje znajšlisia čužyja trusy i kašula.
Pravioŭšy ekśpiertyzu, sudmiedekśpierty vydzielili mužčynski hienatyp na pakinutych rečach. Śledčyja raspačali kryminalnuju spravu, ale paźniej prypynili, bo ŭ bazie dadzienych nie znajšli supadzieńniaŭ i nie vyznačyli, chto ździejśniŭ złačynstva.
U domie dačnicy znajšli adbitki palcaŭ jašče adnaho mužčyny. Na toj momant jon byŭ u vyšuku. Nieŭzabavie jaho zatrymali i asudzili. Svaje pakazańni pa spravie ab kradziažy jon davaŭ jak śviedka, kali ŭžo adbyvaŭ pakarańnie za inšaje złačynstva, nie źviazanaje sa złačynstvam u Słuckim rajonie. Mužčyna raspavioŭ milicyi, što sapraŭdy ŭ 2013 hodzie jon ź jaho pryjacielem zaleźli ŭ hety dom na noč.
«Lahli spać. A kali ja pračnuŭsia, ubačyŭ składzienuju torbu z rečami, a pobač pieraapranajecca hety, biez trusoŭ staić. Ja spytaŭ, navošta jamu rečy, sprabavaŭ adhavaryć. Ale jon skazaŭ, maŭlaŭ, u Baranavičach spatrebiacca», — raspavioŭ śviedka.
U 2017 hodzie ŭ bazie dadzienych źjaviłasia supadzieńnie pa hienatypie z 36-hadovym žycharom Baranavičaŭ. Mužčyna byŭ nieadnarazova sudzimy, pastajanna pjanstvavaŭ i žyŭ dzie daviadziecca. Jaho zatrymała baranavickaja milicyja, kali jon vykraŭ plašku kańjaku z kramy. Adsiedzieŭšy troje sutak, mužčyna vyjšaŭ na volu, ale jaho tut ža zatrymała słuckaja milicyja. Jamu pahražaje da 6 hadoŭ pazbaŭleńnia voli.
