 Viktar Žybul i Viera Burłak |
Padčas prezentacyi knihi, jakaja adbyłasia ŭ piatnicu ŭ Muzei historyi biełaruskaj litaratury, paśla vystupu Viery Burłak i Viktara Žybula krytyk Uładzimier Hniłamiodaŭ zaznačyŭ, što krychu niedarečna deklamavać vieršy, jakija naśledujuć paeta, što tvaryŭ 70 hadoŭ tamu. Nieaktualna, maŭlaŭ.
Varta pahadzicca, što sapraŭdy novy zbornik «Zabi ŭ sabie Sakrata!» šmat čaho ŭziaŭ ad Daniiła Charmsa. Ale dziela spraviadlivaści zaznačym, što sapraŭdnaje adkryćcio Charmsa adbyłosia hadoŭ 15 tamu, a nie 70, u časy pierabudovy. Hety nieardynarny rasiejski paet byŭ represavany ŭ 41-m, i bolšaść jahonych vieršaŭ była pachavanaja pad pyłam archivaŭ. Ale ž najhałoŭnaja pryčyna taho, što nichto nie ŭspaminaŭ pra jahonyja tvory, peŭna, u tym, što Daniił Charms byŭ nie zrazumiety sučaśnikami, bo šmat u čym vypiaredžvaŭ svoj čas.
Heta ž padumać — Daniił Charms tvaryŭ u takija nieprasunutyja hady, kali navat Jaho Baćkoŭskaj Vialikaści Chorchie Luisa Borchiesa jašče tołkam nie było!
Kali litaraturu prypadabniać da nivy, dzie pavinna kałasicca tolki pažyŭna-aktualnaje, dyk žybuloŭskija i burłakoŭskija vieršy krytyka čamuści paraŭnoŭvaje ź niedarečna-jaršystym pustaziellem. Ale ž lepiej — z makam-samasiejkaj ci vasilkami. Bo mienavita jany, adcianiajučy i kantrastujučy z honkimi šychtami kałośsia, nadajuć masivu naležnuju abjomnaść i pahladnaść.
Tvorčaść siamiejnaj pary Viktara Žybula i Viery Burłak — vałaškovyja vočy biellitu. Čałaviek maje prava zabić u sabie Sakrata. Vierš maje prava raści ni na čym i ŭ nikudy.
