U niadzielu ŭ Ńju-Jorku prajšoŭ pieršy ŭ historyi biełaruskaj emihracyi ŭ ZŠA parad na rovarach, pryśviečany 100-m uhodkam abvieščańnia BNR.
Maršrut paradu daŭžynioj u 5 z pałovaj milaŭ byŭ abrany vielmi ŭdała - pačatak u centry Manchetana na Tajms-Skver i zakančeńnie na poŭdni ŭ Boŭlin Hryn-parku ŭ finansavym rajonie. Vialikaja častka darohi pryjšłasia na Bradvej z pryhožymi vidami na znakavyja miaściny Ńju-Jorka: Empajr Stejt, Fłetajran, Junian Skver. Na ažyŭlenych vulicach ńju-jorkcy, pryzvyčajenyja da ekzotyki, emacyjna vykazvali svaju padtrymku i nie lanavalisia zapytacca pra ściah, kab zrazumieć ź jakoj jon krainy. Chłopcy i dziaŭčaty achvotna raskazvali i pra Biełaruś, i pra 100-hadovy jubilej BNR, śviatkavańnie katoraha faktyčna ŭžo pačałosia.Pa pryjeździe ŭ Boŭlin Hryn park adbyłosia ŭračystaje ŭźniaćcio Biełaruskaha bieł-čyrvona-biełaha ściaha na histaryčny fłahštok. Na tym miescy ŭ 1783-m hodzie ŭpieršyniu byŭ uźniaty amierykanski ściah paśla taho, jak u vyniku zakančeńnia Amierykanskaj Revalucyjnaj vajny brytanskija vojski byli vymušany pakinuć Manchetan.
Pad akampaniemient hitary Alaksandra Mazhavoha ŭdzielniki histaryčnaha paradu na rovarach praśpiavali sučasnyja biełaruskija patryjatyčnyja pieśni: ''Ściah'' Źmitra Vajciuškieviča, ''Hraj'' Brutto i ''Try Čarapachi'' NRM. Admietna, što padčas śpievaŭ niekatoryja minaki spynialisia pobač i začaravana słuchali hetyja emacyjnyja pieśni na niezrazumiełaj im movie. Z pryvitalnaj pramovaj vystupiŭ Staršynia Biełaruska-Amierykanskaha Zhurtavańnia Pahonia Vital Zajka. Pieršy ŭ historyi Parad na rovarach byŭ arhanizavany aktyvistami Hannaj Šarko i Alaksandram Mazhavym, viadomymi pa svaich papiarednich prajektach, nakiravanych na abjadnańnie biełarusaŭ ZŠA i na papularyzacyju biełaruskaj movy i kultury ŭ zamiežžy.
Bolej fota pa hetaj spasyłcy
