La budynku administracyi prezydenta rabočyja stancyi abarony raślinaŭ zrazajuć kviecień kaštanaŭ. Dla hetych pracaŭ zadziejničanaja specyjalnaja technika pradpryjemstva «Specparkbud» «Mienskzielenbudu». Jak patłumačyła Radyjo Svaboda načalnica stancyi abarony raślinaŭ Volha Biezek, takija pracy la administracyi prezydenta ładziacca ŭžo treci hod zapar u toj čas, kali kvitniejuć kaštany.
(Biezek: ) «Heta zamoviła ŭ nas rezydencyja prezydenta. Reč u tym, što ŭ ich pakryćcio plitačnaje, hranitnaje. I kali sukviećci kaštanaŭ padajuć, kali zaviazvajucca płady, i ludzi heta rastoptvajuć, to zastajucca rudyja niepryhožyja plamy na plitcy».
Pavodle načalnicy stancyi abarony raślinaŭ, hetyja plamy vielmi składana čyścić, i tamu vyrašyli prybirać sukviećci, jakija znachodziacca nad plitkavym pakryćciom, tyja ž, što rastuć nad hazonam, zastajucca.
Na pytańnie Radyjo Svaboda, ci rabili hetkija ž zamovy inšyja mienskija ŭstanovy, spadarynia Biezek adkazała, što kvietki kaštanaŭ zrazajuć tolki la administracyi prezydenta.
Specyjalist u ekalahičnym pravie juryst Ryhor Fioradaŭ nikoli nia čuŭ, kab dzie-niebudź u śviecie takoje rabiłasia z kaštanami.
(Fiodaraŭ: ) «Toje, što im potym składana hetuju plitku čyścić… Mnie padajecca, što hetaje abhruntavańnie nie daje padstavaŭ rabić takoje z drevami. Pa-pieršaje, heta estetyčna abražaje hramadzianaŭ, tamu što heta raślina, jakuju ŭsie zaŭvažajuć, jakaja vielmi pryhožaja. A pa-druhoje, mnie zdajecca, heta barbarski padychod da drevaŭ. Našmat lepš było b, kab jany albo potym zrezali, albo ŭvohule paprostu čyścili hetuju plitku. Žyćcio drevaŭ u horadzie… Naadvarot, ad ich usio roŭna našmat bolš karyści, čym hetaj całkam umoŭnaj škody».
