Padčas kruhłaha stała «Abarona dziaciej ad niehatyŭnaj infarmacyi ŭ internecie» staršynia sinadalnaha adździeła pa spravach moładzi Biełaruskaj pravasłaŭnaj carkvy ahučyŭ mierkavańnie, što juvienalnaja justycyja — schavany pryncyp satanizmu, paviedamlaje Tut.by.
— Juvienalnaja justycyja — heta schavany pryncyp satanizmu, — zajaviŭ protaijerej Ivan Zadarožny, staršynia sinadalnaha adździeła pa spravach moładzi BPC. — U Jevanhielle skazana, što paŭstanuć dzieci na baćkoŭ i zabjuć ich. Heta strašnyja słovy, jakija raniej byli nie zrazumiełyja, a siońnia jany ŭ dziejańni.
Pa słovach śviatara, niekalki hadoŭ tamu jon byŭ u pravasłaŭnaj supołcy ŭ Antverpenie i mieŭ znosiny z emihrantami ź Biełarusi i Rasii.
— «Što ŭ nas adbyvajecca ŭ škołach? — kažuć jany. — My svaim dzieciam baimsia skazać: «Aprani kurtku ciaplej». Jany chodziać smarkatyja, tamu što my baimsia im skazać. Im naŭprost kažuć: «Nie słuchajcie svaich baćkoŭ», — uspomniŭ tuju sustreču Ivan Zadarožny. — Heta prava, daviedzienaje da absurdu. Heta sataninskaje prava, jakoje ŭ rešcie rešt pryviadzie da źniščeńnia nas. A čałaviek małady, jon pakul ni ŭ čym nie raźbirajecca, i, kali jamu kažuć: «Nie słuchajsia baćkoŭ», — u jaho ŭsio z noh na hałavu pierahortvajecca. I kali jon u hetaj sietcy Internet siadzić, u jaho inšyja vychavalniki atrymlivajucca, jakija dla jaho stanoviacca aŭtarytetami.
Pa słovach protaijereja, takaja tendencyja sprabuje «prarvacca i ŭ našu krainu, ale pakul jašče nie praryvajecca».
