Šašačnamu adździełu ŭ «NN» — mienš za hod. Zaŭvahi prymajem z udziačnaściu, bo nie zakaścianieli. Mienski majstar Mikałaj Hrušeŭski nahadaŭ, što jaho daŭniaha siabra Hantvarha, eks-čempijona śvietu pa stakletkavych šaškach, zavuć Anatol, a nijak nie Arkadź. Prosim daravać chibu, dapuščanuju ŭ №17.
Ciešymsia tym, što sp.Hrušeŭski stanoŭča acaniŭ źmiest našaniŭskich materyjałaŭ, pryśviečanych «prastavataj» hulni. «Rubryka «Našy šaški» viadziecca na dobrym uzroŭni», — napisaŭ šmatvopytny majstar u «Narodnaj voli». Dziakuj jamu za maralnuju padtrymku, vykazanuju i ŭ hazecie «Sport-Kuŕjer».
Pavodle metra, zamiest «ruskich šašak» lepš užyvać vyraz «šaški-64» — «jakija tam jany rasiejskija». Pytańnie sprečnaje: na 64-kletkavaj došcy mahčyma hulać u šaški i pa anhielskich praviłach (prostyja nia bjuć nazad; damka rušyć tolki na adno pole). Nazoŭ «ruskija šaški» zamacavaŭsia i nia śviedčyć pra manapoliju Rasiei na «małuju došku». Ci ž vydadzienaja Skarynam «Biblija ruskaja» zrabiła jaho maskavitam abo piciercam?
Parady byłoha śledčaha kapylskaj prakuratury — drukavać bolš vučebnych pazycyj, abviaścić konkurs rašeńniaŭ. Pa praŭdzie, miarkujem, balšyni čytačoŭ hazety paśla viasny-2006 nie da konkursaŭ. Adnak — što skaža hramadzkaść? Jakoj być rubrycy «Našy šaški»? Vašych dumak čakajuć pa adrasie [email protected].
❏
Ch.Jansan — A.Hantvarh. Chod čornych.
Adkaz: 1…28-32! 2. 37:28 26:37 3. 42:31 22:42 4. 31:13 8:19 5. 48:37 20-25 6. 24:13 25:43 i biełaruski hrosmajstar pieramoh halandzkaha.
