Užo niekalki hadoŭ u miežach vulic Vyzvaleńnia — Špalernaja płanujuć pabudavać šmatfunkcyjanalny duchoŭna-aśvietnicki kompleks Biełaruskaj pravasłaŭnaj carkvy. Ale za ŭvieś čas na abjekcie nie praviali nijakich rabot, i ŭ vyniku ŭ centry Minska ŭ avaryjnym stanie prastojvajuć histaryčnyja budynki XIX stahodździa. Tut.by daznaŭsia, kali praces pačniecca i što mienavita źniasuć dla kompleksu Minskaj jeparchii.
Na terytoryi płanavanaj zabudovy dla kompleksu Minskaj jeparchii znachodziacca dva budynki kanca XIX stahodździa pa vulicy Vyzvaleńnia № 6 i 6a, a taksama barak byłoha vajenkamata i pabudovy jaho haspadarčaj častki pa vulicy Vyzvaleńnia, 8.
U kancy śniežnia 2016 hoda stała viadoma, što dva budynki XIX stahodździa na terytoryi kompleksu pa prajekcie vyrašana źnieści. Budynki nie ekspłuatavalisia bolš za 25 hadoŭ i znachodziacca ŭ avaryjnym stanie. Ale za hetyja amal paŭtara hoda na abjekcie nie praviali nijakich rabot.
Namieśnik kiraŭnika administracyi Centralnaha rajona Vadzim Pieradnia raspavioŭ, što ŭ hetym hodzie zakazčyk płanuje prystupić da realizacyi prajekta šmatfunkcyjanalnaha duchoŭna-aśvietnickaha kompleksu.
- Padčas padrychtoŭčaha etapu praviaduć sietki i źniasuć budynak byłoha vajenkamata na Vyzvaleńnia, 8. Budynki XIX stahodździa na Vyzvaleńnia 6, 6a čakaje rekanstrukcyja — heta abjekty historyka-kulturnaj spadčyny. Ale ŭsio ž taki budzie budavacca paŭnavartasny majomasny kompleks, tamu jany buduć nie ŭ tym vyhladzie, u jakim byli raniej. Prajekt jość, kali finansavańnie paćvierdzicca, to ŭ bližejšy čas pačnuć realizacyju.
U Minskaj jeparchii byli niešmatsłoŭnyja. Pryjšoŭ adkaz za podpisam sakratara protaijereja Andreja Vołkava, što ciapier ažyćciaŭlajecca zaklučny etap prajektnych rabot. Na pytańni ab tym, ci znojdzieny sponsar dla prajekta, jakija terminy budaŭnictva kompleksu, ci byli źmieny ŭ prajekcie paśla hramadskaha abmierkavańnia, adkazu ŭ jeparchii nie dali
