Mark Cukierbierh. Fota: REUTERS/Stephen Lam/File Photo
U nastupnym miesiacie ŭ Jeŭraźviazie maje nabyć moc zakon ab kanfidencyjnaści dadzienych. Heta patrabuje źmienaŭ u pryncypie pracy sacsietki Facebook, jakaja niadaŭna trapiła ŭ skandał, źviazany z atrymańniem inšaj kampanijaj asabistych źviestak ab karystalnikach i vykarystańniem ich u karyślivych metach.
Čytajcie: Što treba viedać pra skandał vakoł «Fejsbuka»: piać asnoŭnych faktaŭ pra toje, što zdaryłasia
Cukierbierh skazaŭ Reuters, što Facebook pracuje nad pryviadzieńniem sacsietki ŭ adpaviednaść z hetym jeŭrapiejskim zakonam, jaki pa sutnaści budzie pracavać u hłabalnym maštabie, prynosiačy niekatoryja jeŭrapiejskija harantyi pryvatnaści va ŭsim śviecie. Ale kali jaho spytali, jakija z častak zakona nie buduć pracavać za miežami Jeŭraźviazu, Cukierbierh skazaŭ nastupnaje:
«My ŭsio jašče vyrašajem peŭnyja detali, ale heta, adnaznačna, budzie niešta važnaje».
Jaho kamientary śviedčać pra toje, što pravy karystalnikaŭ Facebook u inšych krainach mohuć stać mienš abaronienymi, čym pravy jeŭrapiejcaŭ.
Novy jeŭrapiejski zakon, jaki nazyvajecca Ahulnym rehłamientam abarony dadzienych (General Data Protection Regulation), źjaŭlajecca samym bujnym pierahladam prava ŭ halinie pryvatnaści ŭ internecie z momantu naradžeńnia hłabalnaje sietki. Jon daje jeŭrapiejcam prava daviedvacca, jakija źviestki ab ich zachoŭvajucca kampanijami, a taksama prava na ich vydaleńnie.
Apple Inc i niekatoryja inšyja technałahičnyja kampanii zajavili, što jany płanujuć dać ludziam u ZŠA i ŭ inšych krainach takija ž pravy, jakija atrymajuć jeŭrapiejcy.
