Źmieny ŭ zakon ab ŚMI — heta abjektyŭnaja i nieabchodnaja miera. Takoje mierkavańnie vykazaŭ siońnia žurnalistam načalnik hałoŭnaha ŭpraŭleńnia pa narkakantroli i supraćdziejańni handlu ludźmi MUS Hienadź Kazakievič, paviedamlaje BiełTA.
«Nieabchodnaść ich pryniaćcia, biezumoŭna, naśpieła. Internet — heta nie tolki karyść z punktu hledžańnia infarmacyi i kamunikacyi, ale jašče i peŭnaja škoda, a časam pramaja, vidavočnaja pahroza dziaržavie, hramadstvu, siemjam i asobna ŭziatym ludziam», — skazaŭ Hienadź Kazakievič.
Narkazłačynnaść pierajšła z vulic u internet i nabyła rysy kibierzłačynnaści. «Dastatkova skazać, što bolš za 90% narkotykaŭ i psichatropaŭ ŭ krainie raspaŭsiudžvajecca praź internet. I heta nie tolki rekłama i sama kupla-prodaž, ale jašče vykarystańnie elektronnych hrošaj, što vielmi abciažarvaje vyjaŭleńnie i spynieńnie złačynstvaŭ u sietcy. Heta jašče i tak zvany rekrutynh, to bok viarboŭka patencyjnych narkadyleraŭ luboha ŭzroŭniu», — raspavioŭ pradstaŭnik MUS.
Nie varta zabyvać, jakuju pahrozu ŭjaŭlaje bieskantrolnaje vykarystańnie internetu dla dziaciej, źviarnuŭ uvahu Hienadź Kazakievič. «U Biełarusi źjavilisia takija niehatyŭnyja sacyjalnyja źjavy, jak seks-čatynh, sekstynh, hruminh, jakija aktyŭna vykarystoŭvajuć piedafiły. U internecie navat raspaŭsiudžvajucca instrukcyi, jakim čynam schilić dzicia da ździajśnieńnia jakich-niebudź dziejańniaŭ seksualnaha charaktaru», — adznačyŭ pravaachoŭnik. Kolkaść takich złačynstvaŭ u Biełarusi ŭ apošnija hady vyrasła ŭ razy. «Usio heta pierakonvaje dziaržorhany, hramadzianskuju supolnaść u nieabchodnaści efiektyŭna procidziejničać takim źjavam. Kazać ab tatalnym kantroli internetu nie davodzicca — heta niemahčyma. Ale my pavinny vypracavać efiektyŭny kompleks mier, jaki dazvolić adnačasova i vyjaŭlać, i spyniać takuju niehatyŭnuju infarmacyju», — padkreśliŭ Hienadź Kazakievič.
Čytajcie taksama: Čynoŭniki płanujuć zabaranić ananimnyja kamientary ŭ internecie
