«Kommiersantu» stali viadomyja vysnovy ekśpiertaŭ ab pryčynach trahiedyi ŭ Kiemieravie.
Śpiecyjalisty daśledčaha centra ekśpiertyzy pažaraŭ Sankt-Pieciarburhskaha univiersiteta HPS MNS Rasiei padčas pažarna-techničnaj ekśpiertyzy vyśvietlili pryčynu pažaru ŭ Kiemieraŭskim handlova-zabaŭlalnym centry «Zimovaja višnia», achviarami jakoha stali 64 čałavieki.
Pavodle źviestak krynicy «Kommiersanta», da trahiedyi pryviało zamykańnie, vyklikanaje praciokam u dachu HZC. Aŭtamatyčnyja vyklučalniki, jakija vykarystoŭvajucca dla abarony ad zamykańniaŭ i tokavaj pierahruzki, što vyklikaje pierahreŭ elektrapravodki i nastupny pažar, na hety raz čamuści nie spracavali.
Jak raspaviała krynica «Kommiersanta», pavodle papiarednich dadzienych ekśpiertaŭ, pažar u HZC «Zimovaja višnia» 25 sakavika adbyŭsia z-za karotkaha zamykańnia ŭ elektrapravodcy, prakładzienaj na čaćviortym paviersie centra, nad dziciačaj hulniavoj zonaj.
Zamykańnie, miarkujuć ekśpierty, mahło być vyklikana praciokami ŭ dachu.
Śnieh z dachu nie prybiraŭsia, jon pačaŭ padtavać, vada trapiła na draty, jakija «zakaracili».
Pieršym zahareŭsia płastykavy płafon, raźmieščany nad dziciačym suchim basiejnam z parałonavymi kubikami. Ich, u svaju čarhu, uspałymniŭ padpaleny płastyk, jaki kapaŭ źvierchu. Uzharańnie całkam mahło mieć łakalny charaktar, ale jaho chutka razdźmuła vientylacyja, jakuju ŭ momant pažaru nichto nie vyklučyŭ. Sihnalizacyja spracavała na tempieraturu i dym, ale zona hareńnia zalitaja nie była — paśla marazoŭ vadapravod, praviedzieny da sistemy z vulicy, byŭ pierakryty.
Sihnalizacyjnyja datčyki taksama spracavali marna — abviaščeńnie ab pažarnaj tryvozie ŭ budynku ŭklučałasia nie aŭtamatyčna, a ŭručnuju, a achoŭnik, jaki siadzieŭ na knopcy, čamuści jaje nie aktyvavaŭ.
Niekalkich chvilin chapiła, kab zapoŭnić uvieś pavierch dymam. Jakraz u hety čas u adnoj z załaŭ raźmieščanaha na čaćviortym paviersie kinateatra skončyŭsia sieans. Vyjšaŭšy ź jaho, ludzi sutyknulisia sa ścianoj dymu, za jakoj užo byŭ ahoń.
Pavodle papiarednich źviestak, častka hledačoŭ vyrašyła praryvacca praz dym, ale nie prajšli dalej dźviarej zapasnoha vychadu, jakija byli, nasupierak normie, zabłakavanyja. Astatnija zahinuli ŭ zale.
Paźniej u hibieli 37 čałaviek u kinazale byŭ abvinavačany načalnik pažarnaha źviana Siarhiej Hienin, jaki nie pavieryŭ vidavočcam, što kazali pra adrezanych dymam i ahniom ludziej.
Krynica «Kommiersanta» paviedamiła, što na linii, dzie adbyłosia zamykańnie, byli ŭstalavanyja aŭtamatyčnyja vyklučalniki, jakija vykarystoŭvajucca dla abarony ad padobnych zdareńniaŭ, adnak jany pa niejkaj pryčynie nie spracavali.
Nahadajem, što pieršapačatkova praviaralisia dźvie viersii ab pryčynach pažaru, achviarami jakoha stali 64 čałavieki, u tym liku 41 dzicia. Pavodle adnoj ź ich, nadzvyčajnaje zdareńnie adbyłosia mienavita z-za zamykańnia. Druhaja viersija — padpał.
Aficyjnych kamientaroŭ pra vysnovy ekśpiertaŭ «Kommiersanta» pakul niama. Ale vyhladaje, što ŭ Kiemieravie niaspraŭna i parušana było ŭsio, što tolki možna było złamać i parušyć.
