U Viciebsku zatrymali dvuch pradstaŭnikoŭ kryminalitetu rehijona, paviedamiŭ karespandentu BiełTA načalnik adździeła pa baraćbie z arhanizavanaj złačynnaściu 7-ha ŭpraŭleńnia (pa Viciebskaj vobłaści) HUBAZiK MUS Rusłan Bajazitaŭ. Zatrymańni pravodzilisia 5 i 9 krasavika pry siłavoj padtrymcy AMAPu.
Tak, 5 krasavika byŭ zatrymany nieadnarazova sudzimy žychar abłasnoha centra 1965 hoda naradžeńnia, jaki ŭ kryminalnym asiarodździ pazicyjanavaŭ siabie jak «smatračy za Viciebskam». Viadoma, što ŭ dzień zatrymańnia jon padbuchtorvaŭ dvuch hramadzian da dačy chabaru słužbovym asobam prakuratury i suda Viciebska. Suma ŭ $4,5 tys. i BR600 pavinna była dapamahčy vyrašyć pytańnie pa źmienie miery strymańnia i pryznačeńni pakarańnia, nie źviazanaha z pazbaŭleńniem voli, u dačynieńni da abvinavačanaha, jaki znachodzicca ŭ SIZA Viciebska. Zatrymanamu ŭdałosia zavałodać častkaj hetych hrošaj.
6 krasavika ŭ dačynieńni da viciebčuka zaviedziena dźvie kryminalnyja spravy: pa č.5 art.16, č.2 art. 431 KK (padbuchtorvańnie da dačy chabaru ŭ bujnym pamiery) i č.1 art.14, č.3 art.209 KK (machlarstva ŭ bujnym pamiery). Sankcyi nazvanych artykułaŭ praduhledžvajuć pakaranńnie ŭ vyhladzie pazbaŭleńnia voli terminam da 7 hadoŭ z kanfiskacyjaj majomaści. Abvinavačany źniavoleny i źmieščany ŭ SIZA Viciebska.
Pa najaŭnaj infarmacyi, heta nie adzinkavy vypadak padbuchtorvańnia da dačy chabaraŭ i machlarstvaŭ ź jaho boku. Rusłan Bajazitaŭ rastłumačyŭ, što zatrymany źjaŭlajecca pradstaŭnikom kryminalitetu staroj farmacyi, maje šyrokija suviazi siarod kryminalnych aŭtarytetaŭ na postsavieckaj prastory.
Fota UUS Viciebskaha abłvykankama
Druhi zatrymany (na fota) — biespracoŭny raniej sudzimy viciabčuk 1976 hoda naradžeńnia. Jon z 2016 pa śniežań 2017 hoda praz machlarstva zavałodaŭ bujnoj sumaj hrošaj miascovaha žychara. Abvinavačany padachvociŭsia «akazać sadziejničańnie» ŭ viartańni hrošaj daŭžnika, vykarystoŭvajučy svoj ŭjaŭny aŭtarytet u kryminalnych kołach. Hrašovyja srodki daŭžnik staŭ viartać, ale da kredytora jany tak i nie dajšli. U vyniku daŭžnik vymušany byŭ źviarnucca va ŭpraŭleńnie pa baraćbie z arhanizavanaj złačynnaściu. Akramia taho, šlacham vymahalnictva pad pahrozaj prymianieńnia hvałtu i z prymianieńniem hvałtu prymušaŭ paciarpiełaha apłačvać kredyt u pamiery bolš za Br2 tys., aformleny na inšuju asobu. Hrošy pieraličvalisia na bankaŭskuju kartku padazravanaha, byli i najaŭnyja płaciažy — štomiesiac jon atrymlivaŭ ad achviary $150, u tym liku za tak zvanaje kryminalnaje zastupnictva.
Viciebskim HASK 9 i 11 krasavika ŭ dačynieńni da zatrymanaha raspačaty kryminalnyja spravy pa č.3 art.209 (machlarstva ŭ bujnym pamiery), č.2 art. 208 KK (vymahalnictva z pahrozaj prymianieńnia hvałtu i ŭžyvańniem hvałtu). Sankcyi nazvanych artykułaŭ praduhledžvajuć pakarańnie ŭ vyhladzie pazbaŭleńnia voli terminam da 10 hadoŭ z kanfiskacyjaj majomaści. Abvinavačany aryštavany i źmieščany ŭ SIZA Viciebska. Pravaachoŭniki praviarajuć infarmacyju ab ździajśnieńni im anałahičnych złačynstvaŭ raniej. Hramadzianie, paciarpiełyja ad supraćpraŭnaj dziejnaści mužčyny, mohuć paviedamić infarmacyju pa telefonach 8 (029) 714 44 25, 8 (0212) 66 50 44, 67 48 76 abo 8 (033) 399 80 44.
