Ihar Komlik i Hienadź Fiadynič
8 maja lidaram Biełaruskaha prafsajuza REP Hienadziu Fiadyniču i Iharu Komliku vystaŭlenaje kančatkovaje abvinavačańnie va ŭchileńni ad vypłaty padatkaŭ u asabliva bujnym pamiery (častka 2 artykuła 243 Kryminalnaha kodeksa RB), paviedamlaje spring96.org.
Sankcyja artykuła praduhledžvaje pakarańnie ŭ vyhladzie abmiežavańnia voli na termin da piaci hadoŭ albo pazbaŭleńnie voli na termin ad troch da siami hadoŭ z kanfiskacyjaj majomaści abo biez kanfiskacyi, a taksama z pazbaŭleńniem prava zajmać peŭnyja pasady abo zajmacca peŭnaj dziejnaściu abo biez pazbaŭleńnia.
— Nas abvinavačvajuć pa častcy 2 artykuła 243 Kryminalnaha kodeksa — uchileńnie ad vypłaty padatkaŭ u asabliva bujnym pamiery. Śledstva pryjšło da vysnovy: ja i Komlik vinavatyja ŭ tym, što pa vynikach 2011 hoda prafsajuz REP nie zapłaciŭ ŭ dziaržbiudžet padatki na sumu 22 tysiačy 867 rubloŭ 10 kapiejek (z ulikam denaminacyi). Vinavatym siabie nie pryznaju i nie pryznaju nikoli. Liču, što sprava palityčna matyvavanaje, hałoŭnaja meta jakoha — akazać cisk na mianie jak na lidera prafsajuza, na prafsajuz REP i na niezaležny prafsajuzny ruch u cełym, — zajaviŭ lider prafsajuza REP sajtu praca-by.info.
Śledstva ŭkazvaje, što kryminalny pieraśled nieŭstanoŭlenych asob pa kryminalnaj spravie spynieny 7 maja 2018 hoda, bo takich asob i nie akazałasia.
— Śledčyja praviali sotni dopytaŭ pa ŭsioj krainie. Vidavočna, što ŭ vyniku dopytaŭ śledstva pryjšło da vysnovy, što ŭ dziejańniach apytanych asob składu złačynstva niama. Abvinavačanymi zastajucca tolki Fiadynič i Komlik, — padkreśliŭ Hienadź Fiadynič.
Lideram prafsajuza REP padali miesiac na aznajamleńnie z materyjałami spravy, paśla čaho kryminalnaja sprava budzie nakiravana ŭ sud.
— Na praciahu miesiaca my pavinny aznajomicca z materyjałami spravy (kala dziesiaci tamoŭ). Ja pa-raniejšamu zastajusia pad padpiskaj ab niavyjeździe, a tamu moj udzieł u Mižnarodnaj kanfierencyi pracy, jakaja adbudziecca 29 maja - 4 červienia ŭ Ženievie, pad pytańniem, — adznačyŭ lidar prafsajuza REP.
2 žniŭnia 2017 hoda ŭ centralnym ofisie Biełaruskaha prafsajuza radyjoelektronnaj pramysłovaści Departamient finansavych rasśledavańniaŭ KDB pa Minsku pravioŭ pieratrus, anałahičny pieratrus praviedzieny ŭ Salihorsku ŭ ofisie Niezaležnaha prafsajuza harniakoŭ. Lideraŭ REP abvinavacili va ŭchileńni ad vypłaty padatkaŭ u asabliva bujnym pamiery.
Ihar Komlik dva miesiacy pravioŭ za kratami, viečaram 2 kastryčnika 2017 hoda jaho vyzvalili pad padpisku ab niavyjeździe.
Papiaredniaje rasśledavańnie kryminalnaj spravy niekalki razoŭ pradaŭžałasia — apošni termin skončyŭsia 1 maja. Kančatkovaje abvinavačvańnie lideram REP vystaŭlena 8 maja.
