sportgoods.by
Pakul biełaruski biznes pastupova, ale dastatkova paśpiachova pierachodzić na biełaruskuju movu, zastajucca i tyja, chto ličyć biełaruskuju movu niemahčymaj dla vykarystańnia ŭ svaich kramach.
Karystalnik Twitter Jahor Tubielievič vykłaŭ u svaim akaŭncie skrynšoty razmovy z pradstaŭnikom kramy Adidas, što mieścicca ŭ HC «Korona-Zamok».
Sa skrynšotaŭ zrazumieła, što chtości namahaŭsia pracaŭładkavacca ŭ kramu i paprasiŭ dać adkaz pa svajoj kandydatury. Pradstaŭnik kramy zapytaŭsia nakont movy, jakoj karystajecca zapabiahalnik u paŭsiadzionnym žyćci, na što jamu adkazali, što paŭsiadzionnaja mova — biełaruskaja.
«Dobra, kali vy cikaviciesia vakansijaj i hatovyja razmaŭlać na rasiejskaj movie — pryjazdžajcie na sumoŭje siońnia da 18:00 u HC »Zamak«, krama Adidas», — napisaŭ pradstaŭnik kramy.
Tady ŭ pradstaŭnika kramy zapytali, ci aznačaje taki adkaz admovu ŭ pracaŭładkavańni tolki z pryčyny ŭžyvańnia adnoj ź dziaržaŭnych movaŭ.
«Vy ŭsio słušna zrazumieli. Ničoha suprać vas nie maju, ale ŭ našuju kramu razhladzieć vas nie zmožam», — adkazaŭ pradstaŭnik kramy.
U kamientary belsat.eu kiraŭnik kramy Eduard raspavioŭ, što «jon ničoha nie maje suprać biełaruskaj movy, ale ŭ ich tak nichto nie razmaŭlaje».
«My hetak vyrašyli. Ja hetak vyrašyŭ, što ź biełaruskaj movaj nie prymajem. Mnie tak zachaciełasia. Našyja kansultanty tak nie razmaŭlajuć, tamu ja vyrašyŭ, što budziem nabirać tych, chto razmaŭlaje tak, jak usie. U kožnaj arhanizacyi jość niejkija standarty. Ja ŭpaŭnavažany vyrašać takija pytańni samastojna. Z taho, što ja viedaju, małady čałaviek skazaŭ, što budzie sprabavać padstroicca pad rasiejskuju», — skazaŭ Eduard.
Kiraŭnik adździełu roźnicy aficyjnaha pradstaŭnika Adidas i Reebok ŭ Biełarusi «SPORTgoods» paviedamiŭ belsat.eu, što pra situacyju nie viedaŭ i budzie vyśviatlać akaličnaści.
«Heta nie aficyjnaje rašeńnie firmy», — dadaŭ jon.
Pradstaŭnik Adidas paabiacaŭ razabracca ŭ situacyi da kanca tydnia, bo ciapier u jaho zašmat pracy.
Pravaabaronca Valancin Stefanovič kaža, što zakon nie rehuluje ŭžyvańnie movaŭ pamiž dźviuma fizičnymi asobami, ale admaŭlać u pryjomie na pracu tolki praź biełaruskuju movu niedapuščalna.
«Heta dyskryminacyja, ale jość niuansy. Zakon ab movach havoryć, što ŭ śfiery absłuhoŭvańnia i handlu ŭžyvajucca dźvie dziaržaŭnyja movy. Zakon hetaha nie rehuluje. Haspadar kramy moža skazać, što z klijentami pracujuć na toj movie, na jakoj da ich źviartajucca. Uładalnik aryjentujecca na pakupnikoŭ. Tamu zaležyć, ci admovili na padstavie taho, što jon razmaŭlaje ŭ žyćci pa-biełarusku, abo ŭ kantakcie z klijentami admaŭlajecca razmaŭlać na toj movie, na jakoj da jaho źviartajucca».
