Biełaruskim chakieistam miesca ŭ nižejšym dyvizijonie, ale mirycca z hetym nie treba. Pra heta Alaksandr Łukašenka zajaviŭ siońnia, prymajučy z dakładam ministra ŭnutranych spraŭ, staršyniu naziralnaj rady kłuba «Dynama-Minsk» Ihara Šunieviča.
«Toje, što naša zbornaja vylecieła z elitnaha dyvizijona, — heta pa spravie, ich miesca tam. Im niama čaho rabić z takoj hulnioj u hetym dyvizijonie. Ale pahadzicca z hetym my nijak nie možam», — padkreśliŭ Alaksandr Łukašenka.
Kiraŭnik dziaržavy pacikaviŭsia, jak budzie ŭ dalejšym raźvivacca kłub «Dynama-Minsk», jaki źjaŭlajecca bazaj dla padrychtoŭki chakieistaŭ dla nacyjanalnaj zbornaj.
«Ciapier fiederacyja (chakieja) usio bolš kivaje na «Dynama», što kłub nie vykonvaje svaich abaviazacielstvaŭ. Kłub kaža pra toje, što im samim treba hulać i vyjhravać, pakazvać hulniu, tamu jość svaje intaresy. Kab u nas nie było razychodžańniaŭ, treba zrabić tak, kab lepšyja hulcy hulali ŭ «Dynama», a samyja lepšyja dynamaŭskija — u zbornaj», — skazaŭ jon.
«U škodu ŭsim (pažadana, viadoma, biez škody) my pavinny pieravahu addavać zbornaj. Usio pavinna być zakručana na krainu. Pavinny hulać biełaruskija chakieisty i pierš za ŭsio varatary. Heta nie sprava, što ŭ nas niama narmalnaj abarony. Dy i napadzieńnia niama. Kali za dziasiatak matčaŭ nie mohuć zabić dziasiatak hałoŭ, heta nie kamanda», — adznačyŭ Alaksandr Łukašenka.
