Videazapis cudoŭnaha vyratavańnia imhnienna raźlacieŭsia pa sacsietkach.
Mienš za chvilinu Mamudu Hasamu pajšło na toje, kab ŭskaraskacca na čaćviorty pavierch budynka, padciahvajučysia z adnaho bałkona na inšy, i pierachapić chłopčyka z ruk mužčyny, jaki sprabavaŭ utrymać dzicia ad padzieńnia, pierahnuŭšysia cieraz bałkonnuju pieraharodku z susiedniaj kvatery.
Prezident Emaniuel Makron zaprasiŭ 22-hadovaha Hasama ŭ paniadziełak naviedać Jelisiejski pałac, kab asabista vykazać jamu padziaku ad imia ŭsich francuzaŭ.
Videazapis cudoŭnaha vyratavańnia byŭ apublikavany ŭ «Fejsbuku» viečaram u subotu, z tych časoŭ jaho užo pahladzieła amal siem miljonaŭ čałaviek.
Mer Paryža An Idalho taksama vykazała svajo zachapleńnie hieraizmam malijca i raspaviała, što asabista padziakavała vyratavalniku pa telefonie.
Jana nazvała jaho «Čałaviekam-pavukom z 18-j akruhi», majučy na ŭvazie administracyjny rajon Paryža, dzie razharnułasia drama sa ščaślivym kancom.
Pavodle jaje słoŭ, małady mužčyna raspavioŭ joj, što niekalki miesiacaŭ tamu pryjechaŭ u Francyju z Mali ŭ nadziei pačać novaje žyćcio.
«Ja adkazała, što jaho hieraičny žest staŭ prykładam dla ŭsich hramadzian i što Paryž, biezumoŭna, z radaściu padtrymaje jaho imknieńnie ŭładkavacca ŭ Francyi», — dadała mer.
Hasama raspavioŭ žurnalistam, što prosta prachodziŭ mima, kali ŭbačyŭ natoŭp kala adnaho z damoŭ ludziej, jakija hladzieli ŭvierch.
«Ja zrabiŭ heta, bo heta było dzicia, — cytuje jaho Le Parisien. — Ja palez … Dziakuj bohu, mnie ŭdałosia jaho vyratavać».
«Ščaście, što pobač apynuŭsia čałaviek, dosyć padrychtavany fizična, u jakoha chapiła mužnaści kinucca na dapamohu dziciaci», - skazaŭ ahienctvu Frans pres pradstaŭnik pažarnaj słužby vyratavańnia.
Pa dadzienych miascovych ŚMI, baćkoŭ dziciaci ŭ hety čas nie było doma.
Baćku dapytała palicyja pa padazreńni ŭ hrebavańni svaimi baćkoŭskimi abaviazkami. Maci chłopčyka, nakolki viadoma, u subotu nie było ŭ Paryžy.
