30-hadovaja žančyna niekalki miesiacaŭ žyła ŭ Vaŭkavysku z mužčynam, udvaja starejšym za siabie. Razam sa svaim 63-hadovym bojfrendam jany časta vypivali, skandalili.
26 maja pamiž sužycielami paŭstaŭ čarhovy kanflikt. Mužčyna z kułakami nakinuŭsia na žančynu. Kryki ab dapamozie pačuŭ susied.
Jon uvajšoŭ u kvateru i zastupiŭsia za žančynu — pačaŭ bić jaje sužyciela. Spyniŭsia tolki tady, kali paciarpieły nie moh stajać na nahach. Jaho pakłali ŭ łožak i nakryli koŭdraj, paviedamlaje milicyja.
Ranicaj vyśvietliłasia, što mužčyna pamior. Vyklikali daktaroŭ, tyja spačatku nie znajšli śladoŭ źbićcia na ciele niabožčyka. Ale ŭskryćcio pakazała šmatlikija traŭmy. Tady 37-hadovaha abaroncu-susieda zatrymała milicyja. Ciapier jamu pahražaje da 15 hadoŭ pazbaŭleńnia voli.