Vilejskija vadałazy 28 maja ŭ vadajomie ŭ Višnievie Vałožynskaha rajona znajšli cieła 27-hadovaj žančyny, jakaja patanuła napiaredadni ŭ niadzielu, paviedamlaje kraj.by.
— U niadzielu na bierazie vadajoma adpačyvała kampanija maładych ludziej. Raśpivali śpirtnyja napoi, - raskazvaje kraj.by śledčy Inesa Byčkievič. — 27-hadovaja žančyna, žycharka Višnieva, była razam z mužam. Jana pajšła kupacca i stała tanuć. Siabry vyciahnuli jaje na bierah, abłajali i paprasili bolš u vadu nie leźci.
Ale ŭhavory nie dapamahli: maci traich dziaciej znoŭ pajšła płavać i patanuła. Zdaryłasia heta kala 19.00.
U zahinułaj zastalisia 3 dački-školnicy. Dziaŭčynki vučacca ŭ pieršym, trecim i piatym kłasach.
— Ja vyklučaju viersiju suicydu, — kaža śledčy. — Nie dumaju, što žančyna naŭmysna zvodziła rachunki z žyćciom. Heta byŭ niaščasny vypadak, pryčynaj jakomu staŭ ałkahol. U hetyja haračyja dni chaču pieraścierahčy ludziej ad raśpivańnia śpirtnych napojaŭ pablizu vadajomaŭ. U stanie ałkaholnaha apjanieńnia prytuplajecca pačućcio niebiaśpieki. Ni ŭ jakim razie nie leźcie ŭ vadu, kali vy ŭžyli ałkahol.