«Maje sens» — adna ź pieršych kraŭdfandynhavych placovak. Ciaham 8 hod hrošy na sacyjalnyja prajekty tut źbirali praz prodaž sustrečaŭ. Čamu zasnavalniki zakryli sajt maesens.by, za jakuju sumu i kamu chacieli b pradać prajekt, pra heta Svabodzie raspavioŭ Dzianis Kandratovič — zasnavalnik i ŭłaśnik «Maje sens», piša Radyjo Svaboda.
«Chacieli spraścić sabie žyćcio, a musili syści z pracy dziela «Maje sens»»
Dzianisu Kandratoviču byŭ 21 hod, kali razam ź Michaiłam Karpickim jon stvaryŭ hrupu «ŬKantakcie» dziela źbirańnia hrošaj na dabračynnaść. U jakaści łotaŭ udzielniki supołki vystaŭlali sustrečy z saboj: jany pahadžalisia sustrecca z tym, chto prapanuje najbolšuju staŭku. Vyručanyja hrošy išli na dabračynnaść — na lekavańnie chvorych dziaciej abo na patreby dziciačych damoŭ.
Maderavańnie supołki zabirała čas, a tamu siabry vyrašyli aŭtamatyzavać spravu: raspracavali admysłovy sajt. I adrazu paśla zapusku ŭ ich dadałosia pracy: sajt maesens. by chutka staŭ papularnym.
«My dumali, što spraščajem sabie žyćcio, — kaža Dzianis Kandratovič Svabodzie. — Ale adrazu nam daviałosia syści z našych asnoŭnych pracaŭ na paŭstaŭki dziela «Maje sens». Prajšło jašče paŭhoda, i my całkam stali zajmacca hetaj spravaj».
Chobi pieratvaryłasia ŭ sacyjalna adkazny biznes. Ciapier heta nazyvajecca pryvatna-dziaržaŭnym partnerstvam. Heta kali biznes vyrašaje niejkija sacyjalnyja prablemy, ź jakimi składana spravicca za košt biudžetnych arhanizacyj. Za svaje pasłuhi pa pieravodzie hrošaj Maesens. by jak pasiarednik atrymlivaŭ 20%.
Za adzin hod sabrali 250 tysiač dalaraŭ
«Maje sens» źbiraŭ hrošy na dabračynnaść, ale placoŭka nie była klasyčnym kraŭdfandynh-prajektam. Asablivaść «Maje sens» była ŭ tym, što ludzi prapanoŭvali sustrecca z saboj. Da prajektu časta zaprašali publičnych ludziej, sustrečy ź jakimi kaštavali pa niekalki tysiač dalaraŭ. Samaj vysokaj za ŭsie časy była staŭka na Juryja Hurskaha. Za mahčymaść parazmaŭlać ź IT-pradprymalnikam i investaram zapłacili 12 tysiač dalaraŭ.
Bolšaść prajektaŭ — heta zbor hrošaj na lekavańnie chvorych dziaciej, padtrymku dziciačych damoŭ, abo dla hramadzkich arhanizacyj, jakija zajmajucca dabračynnaściu.
«Maje sens» zajmaŭsia tym, na što pavinny byli b iści biudžetnyja hrošy. Ale supracoŭnictva ź dziaržaŭnymi arhanizacyjami kali i zdarałasia, to redka afišavałasia.
«Dla dziaržavy heta niavyhadna, — kaža Dzianis. — Heta pakazvaje ich niazdolnaść davać rady prablemam. Dziciačym damam dapamoha patrebnaja, ale pra heta nielha pisać. Nielha pakazvać, što ŭ ich usio drenna».
Adnak Alaksandar Skraboŭski, dyrektar fondu «Dobra» i kiraŭnik Social Weekend, ličyć, što dziejnaść kraŭdfandynhavych placovak nielha razhladać jak prajavu biednaści krainy.
«Heta najpieršy indykatar uciahnutaści hramadzkaj supolnaści ŭ vyrašeńnie ŭłasnych prablemaŭ, — skazaŭ Skraboŭski Svabodzie. — Źjaŭleńnie novych placovak — heta prykmieta taho, što my sami jak hramadzianie niezaležnaj krainy stanovimsia bolš darosłymi. Nia varta spadziavacca, što dziaržava vyrašyć usie pytańni. Tak nie adbyvajecca ŭ nivodnaj krainie śvietu».
Nia skłalisia stasunki z druhim investaram, i kaściak kamandy syšoŭ
«Heta była adna sustreča, ale tam było try pieramožcy, — tłumačyć Dzianis. — Dla siaredniaj kampanii 4 tysiačy dalaraŭ — heta niašmat. Bo kansultacyja Hurskaha šmat śviežych idej moža prynieści».
Za 8 hod na «Maje sens» sabrali hrošy bolš jak na 500 dabračynnych prajektaŭ — pryvatnych i dla arhanizacyj. Na piku papularnaści sajta — u 2012—2013 hadach — «Maje sens» źbiraŭ 250 tysiač dalaraŭ na hod. Ahułam za vosiem hod na sacyjalnyja prajekty praź platformu ŭdałosia sabrać miljon dalaraŭ.
Z 2011 hodu sajt imkliva raźvivaŭsia. Štodnia siudy prychodziła da 10 tysiač unikalnych naviednikaŭ. Nieŭzabavie kamanda vyrašyła vyjści z analahičnymi prajektami na zamiežnyja rynki: spačatku ŭ Rasiei, a potym u Štatach i Vialikaj Brytanii. U 2012 hodzie raspracoŭščykaŭ «Maje sens» zaprasili ŭ ZŠA, dzie jany pracavali nad prajektam pad nazvaj Goodwillion. Na niekalki miesiacaŭ biełaruskaja kamanda pierajechała ŭ Kaliforniju. Ale zamiest vychadu na novy ŭzrovień taja vandroŭka stała kancom prajektu.
«Tam byli vielmi dobryja perspektyvy, kampaniju aceńvali ŭ šmat miljonaŭ, — kaža Dzianis. — Ale ŭ nas nia skłalisia stasunki z druhim investaram, i kamanda razvaliłasia. Kaściak kamandy syšoŭ».
U 2013 hodzie z «Maje sens» syšli ŭsie suzasnavalniki, akramia Dzianisa Kandratoviča. Pa jaho słovach, apošnija piać hod sajt byŭ u stahnacyi.
«U mianie jašče byli plany. Ale na toj momant ja vyrašyŭ zajmacca inšym startapam. Bo ŭnutry ŭžo ŭsio pierahareła. U nas byli vialikija nadziei, a potym jany abarvalisia. Heta vielmi ciažka».
Novaje žyćcio prajektu nadaŭ Jury Zisier, jaki dałučyŭsia da Maesens u 2014-m. Dziakujučy zasnavalniku TUT. BY prajekt Social Weekend, jaki pačynaŭsia na «Maje sens», pieratvaryŭsia ŭ niezaležny chakaton. Tam možna atrymać hrošy na raźvićcio svajho sacyjalnaha prajektu.
Treba addać «Maje sens» u kiravańnie ludziam, jakija buduć hetym hareć
Dzianis kaža, što vyrazna bačyć budučyniu «Maje sens», u jaho jość nie adna ideja dla raźvićcia prajektu. Napačatku treba zrabić pierazapusk sajtu z mabilnaj aplikacyjaj. Ale samomu zajmacca hetym jamu ŭžo nia chočacca.
«Treba addać «Maje sens» u kiravańnie ludziam, jakija buduć hetym hareć».
Ad pačatku 2018 hodu sajt nie pracuje, bo šukajuć pakupnika. U 2012—2013 hadach za «Maje sens» prapanoŭvali da 150 tysiač dalaraŭ. Siońnia ŭłaśniki hatovyja addać uvieś prajekt za 10 tysiač dalaraŭ. U hety košt uvachodzić 40 hadzin kansultacyi Dzianisa Kandratoviča.
«My nia stavim zadačy zarabić na «Maje sens», — kaža Dzianis. — Asnoŭnaja meta — kab prajekt praciahvaŭ žyć pad novym kiraŭnictvam».
U jakaści pakupnikoŭ jon bačyć ci dabračynnyja arhanizacyi, jakija b chacieli źbirać hrošy na ŭłasnyja prajekty, ci sacyjalna-adkaznyja biznesy.
«My hladzim nia tolki na košt, jaki prapanuje pakupnik, — kaža Dzianis. — Kali my pabačym, što čałaviek haryć, mahčyma, što ździełka adbudziecca i za mienšyja hrošy».Siońnia na biełaruskim rynku kraŭdfandynhu jość try asnoŭnyja placoŭki: «Ulej», Talaka, časopis «Imiena». Ale ci budzie tut miesca dla zabytaha, a apošnija paŭhoda jašče i zakrytaha «Maje sens»? Alaksandar Skraboŭski ličyć, što miesca na biełaruskim rynku kraŭdfandynhu jašče vielmi šmat. Pa jaho słovach, tolki ŭ apošni čas kraŭdfandynh-placoŭki pačali specyjalizavacca na prajektach roznaha kštałtu.
«Ciapier adbyvajecca praces pieršasnaj sehmentacyi, i heta vielmi rańniaja stadyja rynku. U nas jašče proćma nišaŭ», — skazaŭ Skraboŭski.
