Siońnia byŭ abvieščany laŭreat premii Biełaruskaha PEN-Centru «Kniha hodu», jakuju ŭručajuć sami piśmieńniki za najlepšuju knihu, napisanuju biełarusam ci ŭ Biełarusi na luboj movie, jakoj karystajucca biełarusy, paviedamlaje «Radyjo Svaboda».
Laŭreatam premii «Kniha hodu» ŭžo druhi raz staŭ Alhierd Bacharevič. Hetym razam pośpiech jamu pryniesła kniha «Sabaki Eŭropy», jakaja vyjšła ŭ vydaviectvie «Łohvinaŭ» u śniežni 2017 hodu.
Pra hetuju knihu aŭtar skazaŭ tak:
«Ja narešcie napisaŭ tuju knihu, jakuju chacieŭ i da jakoj daŭno išoŭ. Mienavita tymi słovami, jakimi chacieŭ, toj kolkaściu słovaŭ. Ja stvaryŭ novuju movu, ja zhulaŭ u składanuju hulniu i atrymaŭ asałodu ad usich jaje chadoŭ, pastak, labiryntaŭ, hałasoŭ, ja kinuŭ vyklik samomu sabie, čytačam, niešmatlikim sapraŭdnym krytykam, ja stvaryŭ tajamnicu. Litaratura niemahčymaja biaz vykliku i biez tajamnicy. Ja narešcie addaŭ daninu svaim nastaŭnikam i pieraadoleŭ ich upłyŭ. Ja napisaŭ knihu, niezaležnuju ni ad kanjunktury, ni ad modnych pavievaŭ, tendencyj, -izmaŭ… Hetaja kniha maje svaju, unutranuju siłu, jana budzie isnavać, žyć, što b ni adbyłosia sa mnoj, litaraturaj i śvietam. Jana bolšaja za ŭvieś hety kalalitaraturny śviet i jahony karotki kalandar…»
Pieramožca atrymlivaje pryz pamieram 1000 eŭra ŭ rublovym ekvivalencie pavodle kursu Nacbanku.
Alhierd Bacharevič byŭ pieršym laŭreatam zasnavanaj čatyry hady tamu Biełaruskim PEN-Centram premii «Kniha hodu». Tady kalehi-piśmieńniki addali pieravahu jahonaj knizie «Dzieci Alindarki» (2014).
Paralelna ź piśmieńnickim hałasavańniem svajho pieramožcu siarod dzieviaci «finalistaŭ» premii vyznačali i «zvyčajnyja» čytačy, jakija mahli pakinuć svoj na admysłova stvoranym sajcie. Ich sympatyi zavajavaŭ Pavał Sieviaryniec za knihu «Biełarusalim».
