«NN» užo paviedamlała, što 11 červienia byŭ uzłamany tvitar pieršaha namieśnika kiraŭnika Administracyi prezidenta Maksima Ryžankova. Nieviadomyja złamyśniki ad jaho imia vykłali fejkavaje vybačeńnie pierad rasijanami za «arhanizavanyja nami miery suprać Rasijskaj Fiederacyi ŭ halinie infarmacyjnaj biaśpieki».
Maksim Ryžankoŭ. Fota Siarhieja Hudzilina.
Byŭ padrobleny dakumient, jaki nibyta padpisała kiraŭnica Administracyi prezidenta Natalla Kačanava. Admietna, za pałovu dnia biełaruskija śpiecyjalisty tak i nie viarnuli kantrolu nad hetym akaŭntam.
Najbolš źviartaje ŭvahu, što kamientavać fejkavy dopis kinulisia tak zvanyja «olhinskija boty», a mienavita karystalniki ź śpiecyjalna stvoranymi pad padzieju pustymi akaŭntami. Usie boty majuć prykładna adnolkavyja ničym nie admietnyja niki: «Lena Śmirnova», «Volha Žukava», «Śviatłana Jakaŭleva», «Alena Sakałova», «Maryja Ivanova».
Troli najpierš kidajuć spasyłki na tyja sajty, jakija pavieryli, što Ryžankoŭ nasamreč takoje napisaŭ, a paśla idzie ataka ŭ bok Biełarusi, a nie čynoŭnika. Voś što pišuć boty:
«Naša «brackaja» Biełaruś chłusić ad usioj dušy»
«Biełaruś — heta prykoł, što takoje, nie razumieju»
«Biełaruś, mnie zdajecca, navat pahroza dla Rasii»
«Biełarusy kryŭdziać najbližejšaha sajuźnika»
«Jany straciać svajho siabra i brata ŭ asobie Rasii, bo jany niaŭdziačnyja»
«Jany Rasiju abražajuć, hodzie heta ciarpieć»
«Baćka adkryŭ siezon palavańnia na Rasiju i choča hrošaj, i ŭvieś čas chłusić»
«Ja im užo nie daviaraju. Dzie im vyhadna — skažuć praŭdu, dzie nie — schłusiać»
«Biełaruś — heta armija zdradnikaŭ, im daviarać nielha»
«Žychary Biełarusi žyvuć za rasijskija hrošy»
«Hetaja dziaržava sama pa sabie nie isnuje»
«Biełaruś jak dziaržava nie isnuje»
«Biełaruś — heta niedadziaržava»
«Navat dziakuj nie skažuć, svołačy»
Faktyčna heta pieršy padobny vypadak takoj padrychtavanaj zahadzia i spłanavanaj kibierataki na biełaruskaha čynoŭnika. Raniej niešta padobnaje rasijskaja «fabryka trolaŭ» vyrablała z ukrainskimi čynoŭnikami i ekśpiertami. Ciapier, jak bačym, sprava dajšła i da biełarusaŭ. U vypadku z Ryžankovym bačycca akurat kibierataka nie suprać kankretnaha čynoŭnika, a suprać usioj dziaržavy. I ŭ budučyni Biełaruś musić viedać, jak adkazvać na padobnyja vykliki.
