30 červienia na adzin dzień kala «Minsk-Areny» adkryjecca tematyčny park zabaŭ «Kraina Maroziva Bieły polus». Mini-krainu, dzie projdzie vialiki sałodki fiestyval, arhanizatary pabudujuć u honar vialikaha śviata — 80-hodździa biełaruskaha płambiru. Aficyjnaj movaj sałodkaj krainy budzie biełaruskaja, a impravizavanaja stalica — «Mova-Sici». Mienavita tut hazieta «Naša Niva» adkryje aleju svaich najlepšych vokładak.
«U dalejšym vypusku drukavanaj haziety nie zastałosia praktyčnaha sensu, tamu my spynili vychad na papiery i praciahvajem svajo isnavańnie ŭ elektronnaj formie jak partał NN.BY, — kaža hałoŭny redaktar vydańnia Jahor Marcinovič. — Paśla vychadu apošniaha numaru my z nastalhijaj i zachapleńniem razhladali našy staryja pieršyja pałosy i zrazumieli, što chočam padzialicca hetym z našymi čytačami. Tak i ŭźnikła ideja adkryć aleju pieršych vokładak «Našaj Nivy» na fiestyvali «Kraina maroziva».
Akramia špacyru pa alei «NN» u «Mova-Sici» možna budzie zhulać u hihancki biełaruskamoŭny «Skrabł» i pasprabavać svaje siły ŭ nastołkach na biełaruskaj movie. Za pieramohu ŭdzielniki atrymajuć kupony, jakija možna abmianiać na ŭpakoŭku płambiru «Bieły polus». Tut ža źjavicca mini-markiet, u jakim «hramadzianie» «Krainy Maroziva» zmohuć nabyć biełaruskija knihi i adzieńnie ad staličnych dyzajnieraŭ.
Paśla markieta haściam festu prapanujuć adpravicca na sieans chutkaha znajomstva, dzie ich navučyć biez saramlivaści razmaŭlać na biełaruskaj movie: pra naša niaŭstojlivaje nadvorji, lubimuju knihu, apošniaha «Dedpuła» abo lubimy smak marožanaha.
— Sprava ŭ tym, što płambir «Bieły polus» — heta maroziva, jakoje my adnavili pa recepcie 80-hadovaj daŭniny jak padarunak dla biełarusaŭ u honar jubileju. Jon razmaŭlaje na biełaruskaj movie i budzie pradavacca tolki ŭ našaj krainie, — tłumačyć namieśnik dyrektara pa markietynhu brenda «Bieła Polus» Maksim Žurovič. — My razumiejem, što siońnia ŭ hramadstvie daminuje ruskaja mova, ale niama takoha biełarusa, jaki b nie razumieŭ «matčynaj movy». My ŭpeŭnienyja, što ŭ «Krainie Marozivie» nam udasca pakazać usiu pryhažość i sučasnaje hučańnie našaj rodnaj movy.
Biełaruskaja mova budzie hučać i na inšych placoŭkach festu, u prahramie jakoha vuličnyja tancy, majstar-kłasy dla dziaciej i darosłych, ličbavyja zabavy minułaha i budučyni. Dla amataraŭ i prafiesijanałaŭ sportu arhanizatary zładziać pieršuju ŭ historyi «Płambiryjadu», dzie možna pazmahacca ŭ kiorlinhu, kidańni śniežak, pinh-ponhu i stralbie ź mieha-rahatki. U nastalhiju pa dziacinstvie darosłych akunuć hulni ŭ humku i kłasiki.
Hałoŭnaj fiškaj fiestyvalu arhanizatary ličać mahčymaść vyjści na lod hałoŭnaha zimovaha kompleksu krainy. Upieršyniu katok «Minsk-Areny», zvyčajna adkryty tolki dla prafiesijnych spartsmienaŭ, prymie biełarusaŭ dla masavaha katańnia.
U 16:00 na hałoŭnaj scenie pačniecca biełaruskamoŭny open-air, vystupiać Akute, «Małanka Arkiestr», «Razbitaje serca pacana» i Shuma.
Uvachod na śviata svabodny, «vydatny nastroj» harantavany ŭsim!
