Na śviatkavańni Kupalla ŭ Aleksandryi padčas teatralizavanaha pradstaŭleńnia «Małaja Radzima» pobač z Alaksandram Łukašenkam siadzieŭ jaho małodšy syn Mikałaj, kiraŭnik Administracyi prezidenta Natalla Kačanava, rasijski miljarder Michaił Huceryjeŭ i Alina Roskač. Što viadoma pra dziaŭčynu?
Pobač z prezidentam — Mikałaj Łukašenka, Natalla Kačanava, Alina Roskač i Michaił Huceryjeŭ. Fota: pres-słužba prezidenta Biełarusi.
Padčas turniru pa bijatłonie «Śniežny snajpier» u Raŭbičach u sakaviku 2018 hoda, jak piša BiełTA, Alina Roskač udzielničała ŭ honcy razam z Alaksandram Łukašenkam, jaho pres-sakratarom Natallaj Ejsmant, dziaržaŭnaj słužačaj Darjaj Šmanaj, bronzavym pryzioram Alimpijady ŭ Nahana Alaksiejem Ajdaravym, pryzioram alimpijskich hulniaŭ pa mastackaj himnastycy Ksienijaj Sankovič, doktaram Śviatłanaj Kanašenka, vykładčykam fizkultury Astrašycka-Haradockaj siaredniaj škoły Anatolem Vaśko, vajskoŭcam Alaksiejem Brytych.
Alina Roskač. Fota: asabistaja staronka Aliny Roskač Ukantakcie.
30 listapada 2017 hoda jana była siarod supracoŭnic słužby pratakołu, jakija sustrakali lidaraŭ krain na samicie Arhanizacyi damovy ab kalektyŭnaj biaśpiecy (ADKB).
Alina Roskač rodam sa Śvietłahorska. Joj 21 hod. Jana vučycca ŭ BNTU, i jak vynikaje ź jaje intervju «Śvietłahorskim navinam», dziaŭčyna stanie inžynieram-mietałurham.
Fota: asabistaja staronka Aliny Roskač Ukantakcie.
U 2016 hodzie jana ŭdzielničała ŭ konkursie «Mis Biełaruś». I choć nie zavajavała pryzavoha miesca, jaje ŭsio adno zaŭvažyli. «Śvietłahorskim navinam» Alina raspaviadała, što jaje mama pamierła paśla insultu, baćku dziaŭčyna nie viedała, tamu što baćki nie byli ŭ šlubie.
Fota: asabistaja staronka Aliny Roskač Ukantakcie.
Viadoma, što Alina školnicaj pradstaŭlała Śvietłahorsk na konkursie pryhažości i hracyi «Kryštalnaja Nimfa» u Homieli. Taksama jana tancavała ŭ kalektyvie estradnaha tanca «Rytm» u Śvietłahorskim domie kultury enierhietykaŭ. Dziaŭčyna ŭdzielničała ŭ «Mis Dažynki-2013». Na sajcie BNTU paviedamlajecca, što ŭ 2016 hodzie na konkursie ŭniviersiteta jana stała druhoj vice-mis.
