Jak paviedamlaje viedamstva, kancepcyja ŭzhodnienaja z hramadskimi arhanizacyjami dy zacikaŭlenymi ministerstvami i nakiravanaja ŭ Saviet Ministraŭ. Kali ŭsio składziecca dobra, to ŭžo vosieńniu dakumient trapić na vočy Alaksandru Łukašenku, a naleta moža być pryniaty i zakon.
Paznajomicca z usim tekstam mahčymych novaŭviadzieńniaŭ možna na sajcie MUS, pakul ža prapanujem źviarnuć uvahu na hałoŭnyja, revalucyjnyja prapanovy, pra źjaŭleńnie jakich u Biełarusi havorać užo šmat hod.
Adznačyć u dakumiencie samyja pazityŭnyja momanty nam dapamahli Alaksandra Dzikan (zasnavalnica Centra pa prasoŭvańni pravoŭ žančyn «Jaje pravy») i Iryna Alchoŭka (kiraŭnica arhanizacyi «Hiendarnyja pierśpiektyvy»).
Fota: womans.ws
Pašyranaje aznačeńnie chatniaha hvałtu i jaho ŭdzielnikaŭ
Narešcie, i byłyja sužency, i prosta partniory (a nie tolki blizkija svajaki i tyja, z kim u čałavieka aformleny aficyjny šlub) traplajuć u śpis členaŭ siamji, dziejańni jakich mohuć razhladacca jak chatni hvałt. Pakarać byłoha muža, jaki ŭsio jašče ličyć, što žonka jamu niešta vinnaja i vyśviatlaje ź joj adnosiny, ci čałavieka, jaki žyvie z vami pad adnym dacham i kradzie pradukty z chaładzilnika, pry tym što vy daŭno ŭžo nie blizkija ludzi, budzie praściej.
Asobna prapisanyja padvidy hvałtu: fizičny, ekanamičny, psichałahičny. Raniej za toje, što muž zabaraniaŭ žoncy vučycca, pracavać i pazbaŭlaŭ luboj samastojnaści, pryciahnuć da adkaznaści było składana. Ciapier heta praściej — treba budzie tolki dakazać.
Prapanoŭvajuć vyznačać usie mahčymyja ryzyki zahadzia
U kancepcyi zakona hučyć paniaćcie «adznaki ryzykaŭ». Heta vielmi pieradavaja praktyka, jakaja prapanoŭvaje razhladać pavodziny ahresara ŭ kompleksie, a nie prosta rabić vysnovy z faktaŭ hvałtu. U dačynieńni da ahresara składajecca peŭny ček-list: ci pryciahvaŭsia jon da adkaznaści raniej, ci maje zbroju, ci nanosiŭ škodu žyviołam i hetak dalej. Hledziačy na ŭsie hetyja sabranyja fakty, supracoŭniki orhanaŭ mohuć acanić stupień ryzyki, što incydent paŭtorycca. Takaja praktyka z pośpiecham prymianiajecca i ŭ Aŭstryi, i ŭ Vialikabrytanii, i ŭ ZŠA — budzie cikava, ci ŭvojdzie jana ŭ zakon u nas.
Apieratyŭnaść z abaronnymi pradpisańniami
Praduhledžvajecca raździalić abaronnyja pradpisańni na terminovyja i mienš terminovyja. U mižnarodnaj praktycy terminovaje pradpisańnie (kab na čas raźvieści baki, što kanfliktujuć i praduchilić mahčymyja nastupstvy) pavinna vydavacca ŭ toj ža momant, kali zdaryŭsia vyjezd na vyklik, a nie praź niekalki dzion, jak maje miesca ŭ nas, kali abodva baki ŭžo supakoilisia i prymirylisia. Supracoŭnik adździeła ŭnutranych spraŭ moža prymusić kryŭdziciela pakinuć pamiaškańnie, jakoje jon da hetaha dzialiŭ z achviaraj, na termin da 15 dzion. Pry najaŭnaści sankcyi prakurora hety termin moža pavialičvacca (kali idzie kryminalny praces, naprykład, ci treba padzialić majomaść).
Nie prosta karać, ale i sprabavać reabilitavać
Hučyć mahčymaść źjaŭleńnia novych prahram pa pracy z kryŭdzicielami — heta adlustroŭvaje razumieńnie MUS, što pakarańnie, štrafy nie zaŭsiody vypraŭlajuć čałavieka. Treba pracavać z pavodzinskimi paternami, psichałohij i hetak dalej. Praŭda, važna, kab hetyja prahramy byli zroblenyja pa mižnarodnych uzorach i ich naviedvańnie było prymusovym.
Atrymańnie dapamohi — nie tolki pa zajavie
Akazańnie pasłuh dla achviary hvałtu nie pavinna zaležyć ad jaje hatoŭnaści źviarnucca pa dapamohu. Siońnia, kab trapić u kryzisny pakoj, ad paciarpiełych patrabujuć fakta zvarotu ŭ milicyju. Ale stavić napisańnie zajavy ŭmovaj atrymańnia dapamohi — niapravilna. Uvohule, ličyć Iryna Alchoŭka, rasśledavańni pa spravach hvałtu pavinny pravodzicca navat biez adsutnaści zajavy paciarpiełaha, bo, naprykład, baćki, jakija pakutujuć ad svaich dziaciej, nikoli nie napišuć na ich zajavu ŭ milicyju, navat kali majecca pahroza žyćciu.
Bić dziaciej — nie vychavańnie
Kali zakonaprajekt nabudzie moc, pa lubym fakcie hvałtu ŭ dačynieńni da dziaciej možna budzie źviartacca ŭ milicyju. Treba razumieć, što vychavańnie pabojami — heta nie miera vychavańnia i nie pryvatnaja sprava siamji.
Praŭda, jak adznačajuć pradstaŭnicy niedziaržaŭnych abjadnańniaŭ, zakon — nie panaceja. Na nastupnuju ranicu paśla jaho pryniaćcia my pračniemsia ŭ toj samaj krainie, i namahańniaŭ dla realizacyi zakona treba budzie prykłaści jašče bolš, čym dla jaho stvareńnia.
