Infarmacyjny partał «Rečyca. Biez cenzury» vykłaŭ fota- i videazdymki šturmu kabinetaŭ centralnaha rajonnaha špitala padčas płatnaha prachodžańnia medkamisii. Kiroŭcy, pedahohi, pradaŭcy, palaŭničyja vymušanyja šmat času tracić na čerhi, tam uźnikajuć sprečki i kanflikty, paviedamlaje Radyjo Svaboda.
«Durdom» rajonnaha značeńnia
12 lipienia ŭ kabinecie neŭrolaha adbyłasia bojka, pad čas jakoj lekarka ŭdaryła rukoj čałavieka, jaki zdymaŭ sprečku na videa. Jak śćviardžajuć čytačy sajtu na forumie, paśla hetaha daviałosia vyklikać milicyju ŭ budynak palikliniki.
Pavodle kamentataraŭ, adnym z samych «haračych» staŭ kabinet neŭrolaha Aleny Šaŭčenki, u čarzie da jakoj treba adsiedzieć paŭdnia ci navat bolš. Navat sama lekarka pryznałasia ludziam: joj strašna, bo ŭ vyniku mohuć pajści na šturm — pad dźviaryma pastajannaja šturchanina i łajanka.
Zrešty, niezadavolenyja sytuacyjaj i sami lekary, jakija pryznajuć, što taki «durdom» maje miesca tolki ŭ Rečycy. Planavuju medkamisiju adnačasova prachodziać rabotniki metyznaha zavodu, adździełu adukacyi, a taksama aŭtaamatary i achvotniki lehalizacyi zbroi.
Svaboda źviarnułasia pa tłumačeńnie sytuacyi da Siarhieja Tananykina, namieśnika hałoŭnaha ŭrača pa medyčnym absłuhoŭvańni nasielnictva Rečyckaha rajonu. Jon zajaviŭ, što heta byŭ vyklučny vypadak, zvyčajna medahlady prachodziać spakajniej.
«Na žal, heta ekstraardynarny vypadak, jaki moža ŭźniknuć dzie zaŭhodna, nia tolki va ŭstanovie achovy zdaroŭja, i navat nia stolki, — skazaŭ Tananykin. — Niachaj milicyja sama zajmajecca hetym pytańniem, prynamsi pakul ja nia viedaju ni vynikaŭ hetaj spravy, ni jakim čynam padziei buduć raźvivacca dalej».
Pryčyny ažyjatažu
Naviedniki kažuć, što da samich lekaraŭ pretenzij nia majuć. Naadvarot, jany zachaplajucca vytrymkaj i ciarpieńniem medykaŭ. Vinavatymi jany ličać dziaržaŭnyja arhanizacyi, jakija namahajucca adnačasova ŭcisnuć supracoŭnikaŭ u adzin hrafik.
«Roznyja pryčyny, u tym liku jakija tyčacca hrafiku pa pradpryjemstvach, — kaža Siarhiej Tananykin. — I kali zdarajecca zboj — pa vinie zavodu ci rabotnika — pačynajuć iści, kali im zručna, stvarajučy pieradumovy da «pierahruzu». To bok, ściakajecca ludziej bolš, čym zaplanavana. Aproč vytvorčaściaŭ, uzhodnienych hrafikam, źviartajucca i tyja, kaho praduhledzieć nielha. Heta i aŭtakiroŭcy, i amatary našeńnia zbroi, i supracoŭniki adździełu adukacyi, jakija karystajucca letnim adpačynkam. Patok nie pradkazalny. Heta stvaraje ažyjataž, bolšuju kolkaść ludziej, čym my mierkavali spačatku».
Neŭrolahu nakiravali padmohu
Siarhiej Tananykin miarkuje, što sezonny ažyjataž pojdzie na spad sam pa sabie, choć heta i słaboje suciašenńje dla tych, chto ŭžo apynuŭsia ŭ epicentry emacyjnych vyśviatleńniaŭ adnosinaŭ. U lubym vypadku, kaža jon, kab palepšyć sytuacyju, na ahlady nakiravali dadatkovaha specyjalista.
«Z ulikam śpioki, ludzi, zrazumieła, na nervach: dastatkova kamuści vyjści ź siabie, kab stvaryć kanfliktnuju sytuacyju. Naturalna, reahujem, namahajemsia stvaryć planavaść, a ŭsie sprečki vyrašyć na miescy. Niahledziačy na toje, što tolki adna staŭka neŭrolaha, dadatkova sa stacyjanaru nakiravali tudy padmohu, kab dapamahčy «razrulić» napłyŭ ludziej. Sprava ŭ tym liku ŭ sezonnaści. Skažam, była ŭstupnaja kampanija, abituryjenty vymušanyja brać daviedki pra mahčymaść navučańnia pa vybranaj specyjalnaści. Navat z hetaha byŭ peŭny ažyjataž».
Pavodle Siarhieja Tananykina, paliklinika medahladaŭ pracuje da 18.00, ale niekalki dzion zapar jon padjaždžaŭ tudy bližej da 18.30, i ŭstanova jašče pracavała — dźviery začyniajucca tolki paśla apošniaha pryniataha pacyjenta.
