Paśla taho, jak Biełaruś pradała Azierbajdžanu svaje sistemy załpavaha ahniu «Pałanez», Armienija zaklučyła kantrakt na pakupku ŭzbrajeńnia z Rasijaj na 100 miljonaŭ dołaraŭ. Ale nie vyklučaje mahčymaści nabyćcia i biełaruskich «Pałanezaŭ». Pra heta zajaviŭ staršynia Savieta nacyjanalnaj biaśpieki Armienii Armen Hryharan, piša Jeŭraradyjo.
«Pakul u asnoŭnym płany pa ŭzbrajeńniach u nas z Rasijaj, ale my možam abmiarkoŭvać i hety varyjant. Tut adno: kali my nabyvajem uzbrajeńnie ŭ inšych krain, to ŭźnikajuć niekalki prablemnych momantaŭ. Pieršy ŭ tym, što ŭ nas vajennaja infrastruktura źviazanaja z Rasijaj. Druhi: kali heta ŭzbrajeńnie potym staić u Nahornym Karabachu, to dla našych patrnioraŭ heta źjaŭlajecca prablemaj», — kaža Hryharan.
Pra toje, što Biełaruś pradała Azierbajdžanu sistemy załpavaha ahniu «Pałanez», stała viadoma ŭ červieni, kali prezident Ilcham Alijeŭ braŭ udzieł u adkryćci vajskovaj čaści rakietnych vojskaŭ Azierbajdžana. Na fota ź mierapryjemstva trapili i biełaruskija «Pałanezy». U toj ža dzień namieśnik ministra zamiežnych spraŭ Armienii Ruben Rubinian zajaviŭ: «Škada, što Biełaruś, siabroŭskaja nam kraina, pradaje ŭzbrajeńnie krainie, jakaja maje z nami kanflikt».
Pa słovach Hryharana, ciapier i MZS, i Saviet nacbiaśpieki Armienii pracujuć nad tym, kab Biełaruś admoviłasia ad prodažu ŭzbrajeńnia Azierbajdžanu. Hetaje pytańnie, siarod inšaha, abmiarkoŭvałasia i na sustrečy Alaksandra Łukašenki z novym lidaram Armienii Nikołam Pašynianam. Praŭda, žadanaha dla Jerevana vyniku ni hetaja razmova dvuch lidaraŭ, ni namahańni MZS i SNB Armienii nie mieli.
«Ja nie dumaju, što možna adzin raz sustrecca i vyrašyć takuju prablemu. My — i Pašynian, i ja — zaraz šmat nad hetym pracujem. Usie našyja čynoŭniki sa svaimi biełaruskimi kalehami abmiarkoŭvajuć hetuju situacyju. I ja dumaju, što praz peŭny čas my pryjdziem da taho, što bolš takich prodažaŭ nie budzie», — miarkuje Hryharan.
Nijakich źmienaŭ ŭ źniešniej palitycy novaje kiraŭnictva Armienii pravodzić nie budzie. «Budziem prytrymlivajecca taho ž kursu, jaki pravodziła naša kraina apošnija 24 hady», — zajaŭlaje staršynia Savieta nacyjanalnaj biaśpieki Armienii Armen Hryharan.
Ťm nie mienš vychodzić z ADKB, siabrami jakoha źjaŭlajucca i Biełaruś, i Armienija, aficyjny Jerevan nie źbirajecca, kaža staršynia Savieta nacbiaśpieki. Pa jaho słovach, źmieny buduć tolki va ŭnutranaj palitycy. Da prykładu, kali kazać pra palityku biaśpieki, to kali raniej kiraŭnictva Armienii zajaŭlała, što ich kraina pravodzić abarončuju palityku, to ciapier hetaja abarončaja palityka stanovicca aktyŭnaj. Heta aznačaje, što zaraz u vypadku nabližeńnia vajennaj pahrozy Armienija budzie prymać «previentyŭnyja kroki».
