Barysaŭski BATE startavaŭ u novym rozyhryšy Lihi čempijonaŭ. Na chatnim stadyjonie biełarusy prymali finski CHIK. Bukmiekiery ličyli BATE biezumoŭnym favarytam dadzienaj hulni, ale na spravie ŭsio vyjšła zusim nie tak biaschmarna.
BATE adrazu zabraŭ miač da svaich noh, šmat atakavaŭ. Na niekatorych adrezkach hulni vałodańnie miača na karyść biełaruskaha čempijona było 75 na 25. Užo na treciaj chvilinie Ihar Stasievič moh vyvodzić svaju kamandu napierad. Niekatoryja zaŭziatary navat padniali ŭhoru ruki, radujučysia hołu. Ale heta byŭ usiaho tolki aptyčny padman.
Druhi realny šaniec BATE ŭpuściŭ na 21-j chvilinie, kali ŭ pierakładzinu zaradziŭ Dźmitryj Baha. Ščyra kažučy, paśla hetaha momantaŭ, jakija možna adnieści da halavych, la varot CHIKa nie zdarałasia.
Što tyčycca haściej, to finy stali bolš upeŭniena siabie adčuvać naprykancy pieršaha tajma. A ŭ druhim brazilec-hrenadzior Kłaŭs navat moh vyvodzić svoj kłub napierad, ale vyratavaŭ Ščarbicki.
Nie ŭzmacniŭ atakujučy patencyjał BATE i vychad Alaksandra Hleba. U atacy biełarusaŭ jaŭna čahości nie chapała. Matč tak i skončyŭsia ź likam 0:0.
Nie varta viešać nasy. Letaś na takoj samaj stadyi BATE taksama nie zmoh pieramahčy doma armianski «Ałaškiert», ale ŭziaŭ vierch u haściach. Matč u adkaz adbudziecca 1 žniŭnia ŭ Chielsinki.
