Amal usie siabry hetaj «hramadskaj rady» pracujuć u dziaržaŭnych orhanach i pradpryjemstvach.
Urad Biełarusi zaćvierdziŭ skład hramadskaha kaardynacyjnaha savieta ŭ śfiery masavaj infarmacyi. Adpaviednaja pastanova Savieta ministraŭ № 1625 ad 29 kastryčnika nabudzie moc 8 lutaha 2009 hoda. Dakumient apublikavany na Nacyjanalnym pravavym interniet‑partale.
Staršynioj savieta pryznačany hałoŭny redaktar haziety «Sovietskaja Biełoruśsija» Pavieł Jakubovič,sakratarom — kansultant jurydyčnaha adździeła pravavoha ŭpraŭleńnia Ministerstva infarmacyi Viktoryja Mialeška. U skład savieta taksama ŭvajšli namieśnik staršyni praŭleńnia ZAT «Druhi nacyjanalny telekanał» Andrej Bas, načalnik pravovaha ŭpraŭleńnia Mininfarmacyi Lilija Bohdan, dacent fakulteta žurnalistyki Instytuta žurnalistyki BDU Natalla Doŭnar, dyrektar hetaha instytuta Siarhiej Dubovik, pieršy namieśnik hienieralnaha dyrektara ZAT «Staličnaje telebačańnie» Viktar Dudko, vykanaŭčy dyrektar Telekamunikacyjnaha halinovaha sajuza Siarhiej Kazańnikaŭ, staršynia HA «Biełaruski sajuz žurnalistaŭ» Anatol Lemiašonok, pieršy namieśnik staršyni Nacyjanalnaj dziaržaŭnaj teleradyjokampanii Alaksandr Sałamacha, hałoŭnyja redaktary haziety «Arhumienty i fakty» v Biełoruśsii» Ihar Sakałoŭ i «Maładziečanskaj haziety» Alaksandr Chazianin, člen HA «Sajuz vydaŭcoŭ i raspaŭsiudžvalnikaŭ druku» Alaksandr Čačora.
Saviet stvorany ŭ adpaviednaści z zakonam «Ab srodkach masavaj infarmacyi», pryniatym 17 lipienia 2008 hoda.Jak vynikaje z pastanovy Saŭmina, saviet źjaŭlajecca «hramadskim kansultacyjnym i kaardynacyjnym orhanam i stvarajecca ŭ metach realizacyi i abarony kanstytucyjnych pravoŭ hramadzian na svabodu atrymańnia i raspaŭsiudžvańnia infarmacyi».
Asnoŭnymi zadačami hramadskaha savieta źjaŭlajucca: kaardynacyja ŭzajemadziejańnia orhanaŭ dziaržkiravańnia, hramadskich abjadnańniaŭ i inšych arhanizacyj, jakija ažyćciaŭlajuć svaju dziejnaść u śfiery masavaj infarmacyi; zabieśpiačeńnie «pravilnaha prymianieńnia zakona ab ŚMI i inšaha zakanadaŭstva ŭ śfiery masavaj infarmacyi»; «razhlad sprečnych pytańniaŭ, što ŭźnikajuć pry prymianieńni zakona ab ŚMI».
Hramadski saviet maje prava: davać acenku ab najaŭnaści (adsutnaści) ŭ pradukcyi vydanych ŚMI parušeńniaŭ zakona; davać tłumačeńni pa pytańniach, što ŭźnikli ŭ pracesie vypusku ŚMI; unosić prapanovy ŭ Ministerstva infarmacyi ab ŭdaskanaleńni zakanadaŭstva ab ŚMI; zapytvać u dziaržorhanaŭ, hramadskich abjadnańniaŭ i inšych arhanizacyj nieabchodnyja dakumienty, što tyčacca pytańniaŭ, jakija ŭnosiacca na razhlad savieta; zaprašać na pasiadžeńni kiraŭnikoŭ redakcyj, zasnavalnikaŭ ŚMI, časopisaŭ i zasłuchoŭvać ich paviedamleńni pa pytańniach, što ŭvachodziać u kampietencyju savieta.
Pasiadžeńni savieta pavinny prachodzić pa nieabchodnaści, ale nie radziej razu ŭ kvartał. Rašeńni prymajucca šlacham adkrytaha hałasavańnia pry prysutnaści nie mienš jak pałovy členaŭ savieta. Arhanizacyjnaje i infarmacyjnaje zabieśpiačeńnie dziejnaści hramadskaha savieta ažyćciaŭlajecca Mininfarmacyi.
