Alaksandr Łukašenka daručyŭ da listapada 2020 hoda zrabić Aršanski miasakansiervavy kambinat adnym ź lepšych pradpryjemstvaŭ haliny. Takuju zadaču kiraŭnik dziaržavy pastaviŭ siońnia ŭ čas naviedvańnia zavoda, piša BiełTA.
Kiraŭnik dziaržavy aznajomiŭsia z arhanizacyjaj jaho pracy i vytvorčaj bazaj. Naviedaŭšy niekalki cechaŭ, jon raskrytykavaŭ haspadarčuju dziejnaść pradpryjemstva, toje, jak utrymlivajucca pamiaškańni i materyjalna-techničnaja baza.
«Da 7 listapada 2020 hoda tut hetaha być nie pavinna. Treba vydzielić srodki, arhanizavać novy zabojny cech, usio heta paznosili (u dačynieńni da starych budynkaŭ) i zrabić sučasnaje pradpryjemstva. Jano pavinna być jak samyja lepšyja miasakambinaty», - padkreśliŭ jon.
Alaksandr Łukašenka taksama pabyvaŭ u AAT «Oršaahraprammaš», jakoje ŭvachodzić u chołdynh «Babrujskahramaš». Jaho prainfarmavali ab finansava-ekanamičnych pakazčykach zavoda, prademanstravali pradukcyju i raspaviali pra pierśpiektyvy raźvićcia pradpryjemstva.
Hienieralny dyrektar «Babrujskahramaša» Alaksandr Jeramiejeŭ paprasiŭ dapamahčy ŭ restrukturyzacyi daŭhoŭ. Usiaho chołdynham majecca kredytaŭ prykładna na Br50 młn. «Padrychtavany prajekt ukaza, uzhodnieny ź ministrami. Atrymajecca ekanamičny efiekt u Br10,2 młn, - adznačyŭ Alaksandr Jeramiejeŭ. - My hrošaj lišnich nie prosim, tolki adterminoŭka».
Kiraŭnik dziaržavy daručyŭ kiraŭnictvu Administracyi prezidenta terminova razabracca ŭ hetym pytańni, dałažyć u bližejšy čas i ŭnieści svaje prapanovy.
«Ale maj na ŭvazie, nie daj boh, nie budzie vykanany ukaz i ty znoŭ pryjdzieš pa adterminoŭku abo rasterminoŭku — kryŭduj sam na siabie», — papiaredziŭ Alaksandr Łukašenka.
