Na dniach u Viciebsku zatrymali namieśnika staršyni Libieralna-demakratyčnaj partyi Biełarusi Siarhieja Jarmykina. Hetuju infarmacyju Tut.by paćvierdzili niekalki infarmavanych krynic.
Siarhiej Jarmykin (druhi sprava, z hieorhijeŭskaj stužkaj) razam z adnapartyjcami. Fota: ldp.by.
«Zatrymali Jarmykina i jašče niekalkich jaho tavaryšaŭ. Niekatoryja byli raniej sudzimymi i nidzie nie pracavali. Ich padazrajuć u ašukanstvie», — skazaŭ surazmoŭca.
Pa słovach jašče adnoj krynicy, hetaja hrupa asob sprabavała vyrašyć pytańni pa źmiakčeńni pakarańnia dla byłoha dyrektara Aršanskaha avijaramontnaha i instrumientalnaha zavodaŭ Uładzimira Trajeckaha, jakoha ŭ pačatku hoda prysudzili da 4 hadoŭ pazbaŭleńnia voli. «»Kazyrali» suviaziami i patrabavali hrošy. Zavałodali niekalkimi tysiačami dalaraŭ, kalekcyjaj maniet i juvielirnymi vyrabami. Ale pieršapačatkova nie płanavali vykonvać abaviazacielstvy», — skazała krynica.
Siarhiej Jarmykin bałatavaŭsia ŭ deputaty, źjaŭlajecca staršynioj Viciebskaj abłasnoj arhanizacyi ŁDP.
Kiraŭnik ŁDPB Aleh Hajdukievič skazaŭ Tut.by, što ŭ hetaj historyi «palityki dakładna niama». «Heta pytańni kamiercyi i biznesu. Ale my pakul aściarožnyja ŭ acenkach. Chaj projdzie pravierka», — zajaviŭ Hajdukievič. «U našaj partyi 50 tysiač siabraŭ. Tamu ŭsiakaje byvaje. Ale ja pastaviŭ zadaču da 2019 hoda ačyścicca i pazbavicca ad niepatrebnych pytańniaŭ. Kab u partyi byli adny «cnatlivyja», jak ja», — dadaŭ palityk.
