Momant hałasavańnia. U centry — Anatol Labiedźka, sprava — Jarasłaŭ Ramančuk.
Fota Julii Daraškievič
Plus 8 – pamiežnaja temperatura dla žyćcia nieapranutaha čałavieka. Plus 8 – z takoj pieravahaj Alaksandar Milinkievič vyjhraŭ u Anatola Labiedźki na kastryčnickim Kanhresie demakratyčnych siłaŭ. Staŭleńnie značnaj častki siabroŭ Abjadnanaj hramadzianskaj partyi da kampanii adzinaha kandydata było paraŭnalnym sa stanam čałavieka na miažy zamiarzańnia.
Ad niadzielnaha Ch źjezdu AHP čakali dobraha skandału. Dziaržaŭnyja ŚMI, što družnym natoŭpam łamanulisia pa akredytacyju, nie praličylisia. Tolki pradbačlivaja admova dziaržaŭnym telekanałam nie zrabiła mierapryjemstva ćvikom eteru.
Cichija kryŭdy pačali vykazvacca jašče pry rehistracyi delehataŭ i haściej. Nikoha ź VIP-personaŭ kaalicyi nie było, zatoje pryjechaŭ namieśnik Alaksandra Kazulina Ŭładzimier Niściuk. Paźniej A.Labiedźka patłumačyŭ, što pamiaškańnie dali zapozna i šmat kaho ź lideraŭ niemahčyma było znajści. U kuluarach havaryli advarotnaje: nichto asabliva šukać i nie imknuŭsia.
Napiaredadni źjezdu adzin z namieśnikaŭ staršyni AHP supakojvaŭ: «Nikoha jon «mačyć» nia budzie. Spravazdača budzie spakojnaj». Nazvaŭšy siabie «aptymistam z krytyčnym uchiłam», A.Labiedźka sapraŭdy ŭžyvaŭ puhu i piernik jak dla svaich, tak i dla čužych. «Ja rasčaravany šmat u kim: u sabie, častkova ŭ svaich namieśnikach, u siabrach partyi. Ale ja nie rasčaravany ŭ stratehii abjadnańnia, jakuju my ŭ svoj čas prapanavali. Ja nie źbirajusia być Ivanam Žachlivym, jaki zabivaje svajo ŭłasnaje dzicia. Adny my stracim nia tolki tvar, ale i samu partyju», – zajaviŭ A.Labiedźka. Svaju partyju jon nazvaŭ «adkaznym partneram i hałoŭnym investaram pracesu kansalidacyi».
Pamiž inšym, jak adznačyŭ palityk, z «kaalicyjnych strukturaŭ» dahetul nie prahučaŭ «abjektyŭny analiz» pracy padčas prezydenckaj honki – «na ličbach, na faktach». «Jak zaŭsiody: dobry toj, chto pryjemny, i niadobry toj, chto maje svaju pazycyju», – zaŭvažyŭ A.Labiedźka.
Najbolš žorstkaj da lideraŭ kaalicyi była taja častka pramovy, dzie viałosia pra padziei ŭ dzień vybaraŭ: «Samaje słaboje miesca – 19 sakavika. Nizy čakali, što rabić, viarchi nia viedali, što rabić. Naviersie, vidać, spracavaŭ instynkt samazachavańnia, i heta treba pryznać». Amal ničoha, pavodle Labiedźki, nia zroblena dla infarmavańnia hramadzkaści pra padziei 19–25 sakavika i dziela «delehitymizacyi vynikaŭ vybaraŭ». A zapis hramadzianaŭ u Milinkievičavy ruch «Za svabodu» Labiedźka ličyć «pramoj padstavaj», bo mohuć pryciahnuć da adkaznaści za dziejańni ad imia niezarehistravanaj arhanizacyi.
U toj ža čas lider AHP paraiŭ nie razhladać jaho palityku jak «pracu z rydloŭkaj, što kapaje pad manument». Jon vykazaŭsia za praviadzieńnie novaha Kanhresu demsiłaŭ, što było adlustranavana i ŭ rezalucyi Ch źjezdu. «Kali Kanhres vyłučyŭ adzinaha kandydata, treba zrabić i spravazdaču. Treba ŭličvać i faktar Kazulina, za jakoha mahła prahałasavać tracina prychilnikaŭ Milinkieviča ŭ vypadku adsutnaści apošniaha. Vyjdzie jon z turmy i skaža: jany ž nas nie paklikali. Na NKDS treba 50–60 prychilnikaŭ Kazulina i 100–120 čałaviek z Majdanu. Heta novaja, žyvaja, nieanhažavanaja kroŭ», – padkreśliŭ Labiedźka.
Napružanaść u dyskusii pavodle spravazdačy ŭzrastała. «Ludzi, što ŭvajšli ŭ arhkamitet NKDS ad AHP, biaździejničali i nie zaminali pramym falsyfikacyjam z boku kankurenta. Milinkievič vykłaŭsia ŭ kampanii nastolki, nakolki heta nieabchodna ŭ Polščy albo ZŠA, i dziakuj Kazulinu za toje, što jon źjaviŭsia» (Jury Istomin). «Štab adzinaha kandydata paśla vybaraŭ nie źbirajecca i nie vyrašaje anijakich pytańniaŭ» (Alena Zaleskaja). «Žanočy ruch u kaalicyi reprezentavany Valancinaj Matusievič, za jakoj niama anivodnaha čałavieka» (Ludmiła Piecina). «Nami skarystalisia, za naš košt źniali viarški, AHP straciła svoj aŭtarytet, i jaje kiraŭnictva pavinna syści ŭ adstaŭku» (Maryna Bahdanovič). «Milinkievič užo amal pensijaner, jamu chutka 60 hod. Anatol Labiedźka – naš prezydent!» Apošnija słovy z vystupu Niny Jermalinskaj z Salihorsku byli apahiejem frondy. Hałasoŭ u padtrymku kaalicyi było niašmat, u asnoŭnym z boku tych, chto ŭ joj i pracavaŭ. Viktara Karniajenku, Alaksandra Dabravolskaha i Ludmiłu Hraznovu sustrakali biez fanatyzmu. Kali Karniajenka zmučana zapytaŭsia, dyk što ž treba było rabić 19-ha, z zali pačuŭsia adkaz: «Stavić namioty!»
U zaklučnym słovie Labiedźka imknuŭsia hulać rolu dobraha kata Leapolda, ale kadravyja rašeńni źjezdu (z pasadaŭ namieśnikaŭ syšli siabry kaalicyi Alaksandar Dabravolski i Siarhiej Alfier, na ich miescy abranyja prychilniki partyjnaha suverenitetu Ihar Šynkaryk i Ŭładzimier Čyrvonienka) paćvierdzili, što struktura AHP budzie drejfavać u bok Kazulina. Niezdarma ž vitalny vystup Niściuka sarvaŭ ci nia samyja hučnyja vopleski.
