Vydańnie «Ježiednievnik» (ej.by) apublikavała artykuł, u jakim źviartaje ŭvahu na vykarystańnie ŭ Biełarusi vakcyny «Eŭpienta» karejskaj vytvorčaści.
Vydańnie nahadvaje, što 13 žniŭnia ŭ Hancavickim rajonie pamierła małoje dzicia paśla vakcynacyi pryščepkaj «Eŭpienta» karejskaj vytvorčaści.
Čytajcie: U Hancavickim rajonie małoje dzicia pamierła paśla pryščepak
Jak heta vakcyna trapiła ŭ Biełaruś?
«Eŭpienta źjaviłasia ŭ Biełarusi z pačatku 2017 hoda, pry hetym vakcyna nie prajšła ŭ našaj krainie nijakich vyprabavańniaŭ i pravierak. Vykarystańnie takoj vakcyny zabaronienaje zakonam «Ab lekavych srodkach», — śćviardžaje «Ježiednievnik».
Pavodle zakona, zavozić u Biełaruś niezarehistravanyja leki možna tolki dla praviadzieńnia vyprabavańniaŭ abo pry masavych epidemijach — usie astatnija vypadki majuć pryvatny charaktar, pa ich vialikija abjomy nie ŭviazieš.
«Pakolki za apošnija hady nijakich usploskaŭ epidemij nie było, to možna padumać, što masavy zavoz «Eŭpienta» adbyŭsia «dla praviadzieńnia kliničnych vyprabavańniaŭ», inačaj mytnia b prosta nie prapuściła tavar. I voś tut samaje strašnaje, bo ŭdzieł u vyprabavańniach — heta dobraachvotnaja sprava, za jakuju płociać vializnyja hrošy i kampiensacyi, kali niešta pojdzie nie tak. Na takija vyprabavańni farmaceŭtyčnyja kampanii vydatkoŭvajuć hady i dziasiatki miljonaŭ dołaraŭ. A tut dla karejskaj kampanii biaspłatna zładzili vyprabavaŭčy palihon ź biełaruskich dziaciej. Moža, nie zusim biaspłatna?» — piša «Ježiednievnik».
Žurnalisty źviartajuć uvahu, što pryščepka «Eŭpienta» nie zarehistravanaja navat u svajoj krainie (pra heta śviedčać dadzienyja na aficyjnym sajcie tamtejšaha rehulatara), chacia Minzdaroŭja na zapyty žurnalistaŭ adkazvała, što «maje dakumient ab rehistracyi z 2014 hoda».
Žurnalisty taksama znajšli śviedčańni, što kliničnyja vyprabavańni «Eŭpienta» pravalilisia ŭ ZŠA, Kitai i Filipinach.
Aproč taho, aŭtary rasśledavańnia źviartajuć uvahu na toje, jak Minzdaroŭja padmanvaje ludziej u aficyjnych adkazach, vydajučy siertyfikaty jakaści mieniedžmientu «šerych» firm — za ich siertyfikaty adpaviednaści, a siabroŭstva tych ža firm u nieaficyjnych farmakałahičnych sajuzach — za śviedčańnie vysokaj jakaści.
Taksama viadoma, što mnohija baćki sapraŭdy skardzilisia na «Eŭpienta», paśla jakoj dzieci niekalki dzion lažali ź vialikaj tempieraturaj.
