Ad žniŭnia hetaha hodu viaducca restaŭracyjnyja pracy ŭ ružanskim pałacy Sapiehaŭ.
U pieršuju čarhu planujecca restaŭravać bramu i flihieli.
Eŭropa nam dapamoža.
Ślady savieckaj restaŭracyi.
Tut niekali byŭ teatar.
Arkada.
Tut budzie muzej.
Ružanski pałac Sapiehaŭ, zakładzieny ŭ pačatku XVII st., pryčakaŭ taki uvahi z boku restaŭrataraŭ. Heta, badaj, pieršyja restaŭracyjnyja pracy za hady niezaležnaści krainy. Jašče ŭ 2004 hodzie Ružanski pałac u liku 26 pomnikaŭ historyka-kulturnaj spadčyny, byŭ uklučany ŭ abłasnuju prahramu raźvićcia turystyčnaj haliny. I nia dziva. Pałac u styli poźniaha baroka z elementami klasycyzmu, biełaruski Versal, jak jaho jašče nazyvajuć, znachodzicca na nadzvyčaj papularnym maršrucie Bieraście — Pružany — Ružany — Kosava.
Najpierš specyjalisty «Bieraścierestaŭracyi» planujuć adnavić hałoŭnuju bramu i flihielaŭ, što da jaje prymykajuć. Tut miarkujecca stvaryć muzej dy inšyja abjekty turystyčnaj infrastruktury.
Pałac Sapiehaŭ mocna paciarpieŭ u hady I Suśvietnaj vajny. Da našych dzion datryvali hałoŭny i ŭschodni karpusy pałacu, arkady, hałoŭnaja brama i bakavyja flihieli. U savieckija časy byli pačali adnaŭlać hałoŭnuju bramu, ale paśla raspadu SSSR pracy spynilisia. Tyja ŭmacavańni z čyrvonaj cehły pačynajuć pakrysie razburacca.
Ad žniŭnia hetaha hodu restaŭracyjnyja pracy ŭ ružanskim pałacy adnavilisia. Jak śviedčyć šylda kala hałoŭnaj bramy, prajekt realizujecca pry finansavaj padtrymcy Eŭrasajuzu ŭ ramkach prahramy dobrasusiedztva. Adna detal na toj šyldzie pakidaje niepryjemnaje ŭražańnie: nazva našaj krainy pa-anhielsku — Byelorussia — patychaje «saŭkom».
Tym časam, naprykancy leta studenty Bieraściejskaha dziaržaŭnaha ŭniversytetu imia Alaksandra Puškina praviali archiealahičnyja raskopki kala ŭschodniaha flihielu. Pavodle kiraŭnictva «Bieraścierestaŭracyi», tempy i abjom restaŭracyjnych pracaŭ buduć zaležyć ad finansavańnia. Pakul što jano, hledziačy pa ŭsim, dosyć ścipłaje. Prynamsi aktyŭnaści, padobnaj da pracaŭ u Niaśvižy, dakładna nie nazirajecca. Moža heta j da lepšaha.
