3 vieraśnia kala ŭvachodu ŭ restaran «Pajedziem pajadzim» u Kurapatach, zakryćcia jakoj damahajucca aktyvisty roznych partyj i hramadszkich arhanizacyj, prajšła pres-kanfierencyja, piša Radyjo Svaboda.
Aktyvisty padviali vyniki 3 miesiacaŭ zmahańnia z ułaśnikami sietki zabaŭlalnych ustanovaŭ pa ŭsim Miensku i abviaścili, što na admysłovym schodzie 9 vieraśnia vyrašać, ci varta pikietavać dalej.
«My bačym jak mieniej čatyry važnyja plusy ad našych dziejańniaŭ, — adznačyŭ sustaršynia BCHD Pavał Sieviaryniec, jaki ad pačatku biare ŭdzieł u pikietavańni. — Ale jość i minusy, tamu my vyrašyli razam z šyrokim kołam hramadzkaści vyznačycca, ci treba nadalej pravodzić pikietavańnie restaracyi abo moža źmianić farmat pratestu na inšy».
Pavodle Paŭła Sieviarynca, hałoŭnym dasiahnieńniem jość toje, što tysiačy ludziej ciapier viedajuć praŭdu pra Kurapaty — miesca hibieli dziasiatkaŭ tysiač achviaraŭ stalinskich represij.
«Pra Kurapaty maŭčała aficyjnaja prapahanda, vielmi mała źviestak pra hetuju trahiedyju atrymlivajuć našy školniki i studenty, my ŭsio heta adčuli na sabie. Tamu toje, što ŭdałosia inicyjavać novuju chvalu hetaj infarmacyi, miarkuju, vielmi istotna, mahčyma, heta samaje važnaje».
Palityk miarkuje: niahledziačy na supraćstajańnie i abmiežavanyja mahčymaści, udałosia razharnuć narodny bajkot restaracyi, pabudavanaj pobač z Kurapatami — i heta jość druhoje važniejšaje dasiahnieńnie pikietoŭcaŭ.
«Restaracyju pa-raniejšamu naviedvajuć za dzień usiaho niekalki čałaviek. Minuli try miesiacy, a jana dalokaja ad kamercyjnaha pośpiechu, faktyčna restaracyja bankrut. Što taksama nadzvyčaj važna», — skazaŭ Pavał Sieviaryniec.
Taksama jon nazyvaje stanoŭčym momantam toje, što na hlebie pratestu ŭdałosia abjadnać namahańni demakratyčnych partyj i arhanizacyj, siarod jakich isnujuć roznahałośsi.
«Abarona Kurapataŭ — sprava śviataja, i my ciapier bačym, što jana abjadnoŭnaje», — kanstatuje Pavał Sieviaryniec.
Čaćviortym plusam kampanii jon bačyć padvyšeńnie hramadzkaj aktyŭnaści ŭ Kurapatach.
«Stali bolš ustaloŭvać kryžoŭ, bolš ludziej prynosiać kvietki, navat pryjaždžaje bolš zamiežnych delehacyj. Na heta musić stanoŭča reahavać i ŭłada», — skazaŭ Pavał Sieviaryniec.
Pry hetym aktyvist pryznaŭ, što abaroncy Kurapataŭ sutyknulisia z šeraham ciažkaściaŭ.
«Heta jak represii z boku dziaržaŭnych pravaachoŭnych orhanaŭ, hetak i nierazumieńnie važnaści takoj spravy z boku častki prostych ludziej. Tamu my vyrašyli pravieści ŭ Kurapatach schod, na jakim sumiesna vyrašyć: ci varta dalej pravodzić pikietavańnie dy jakija formy pratestu abrać. Kali na schod pryjduć sotni ludziej, dyk budzie zrazumieła, što heta sprava nieabyjakavaja hramadzkaści. A kali dva dziasiatki abaroncaŭ, jakija ŭžo 3 miesiacy achviarujuć saboj, — zusim inšaje», — padkreśliŭ Pavał Sieviaryniec.
Schod u Kurapatach pryznačany a 16-j hadzinie 9 vieraśnia. Abaroncy prainfarmavali pra heta ŭłady Mienskaha rajonu.
