U 2012 hodzie brytanskaja kampanija INSTID, jakuju zasnavali biełarusy Alaksandr i Nataša Hrand, vyjhrała tendar na raspracoŭku brenda Minska.
Skončyłasia ŭsio skandałam. Ułady raspłacilisia z Hrandami, ale ich prajekt pakłali na palicu i zabylisia pra ideju brenda biełaruskaj stalicy jak pra strašny son.
Patern, jaki byŭ raspracavany INSTID dla Minska (finalny varyjant)
«Naša Niva» pacikaviłasia, čamu idei Hrandaŭ tak i nie stali vykarystoŭvać.
Nahadajem, u 2012 hodzie za raspracoŭku minskija ŭłady byli hatovyja zapłacić $30 tysiač. Hrošy pa biełaruskich mierkach niebłahija, pa jeŭrapiejskich — tak sabie. Tamu ździŭleńnie vyklikała cikavaść da biełaruskaha prajekta anhlijskaj kampanii INSTID, jakaja ŭ vyniku i pieramahła ŭ konkursie.
Paźniej užo vyśvietliłasia, što Alexander & Natasha Grand, kiraŭniki brytanskaj kampanii, sami ź Biełarusi. Da pierajezdu ŭ Anhliju ich zvali Alaksandr Fiadulin i Natalla Leščanka.
Zdavałasia b, vychadcy ź Biełarusi, jakija stała žyvuć i pracujuć u Łondanie, musiać jak nie chto inšy razumieć miascovyja biełaruskija asablivaści i sučasnyja suśvietnyja trendy. Ale ž kali INSTID pakazali svajo bačańnie łahatypu Minska, źjavilisia sumnievy, jakija paśla pieratvarylisia ŭ adkrytaje niezadavalnieńnie prajektam Hrandaŭ.
Pieršapačatkovy varyjant paternu ad INSTID. Chejtary adrazu achryścili jaho «mikraschiemaj»
U čym tolki nie abvinavačvali ich łahatyp: i ŭ druharadnaści, i ŭ niezrazumiełaści, i ŭ tym, što ideja łahatypu ničym, akramia «bačańnia» samich aŭtaraŭ, nie abhruntoŭvałasia.
Taksama Hrandaŭ upikali ŭ banalnym płahijacie i nieprafiesijanaliźmie: maŭlaŭ, vielmi padobny patern možna za kapiejki nabyć u fotastoku.
A słohan «Think London» vykarystoŭvała meryja anhlijskaj stalicy. Na heta kiraŭniki INSTID (jakija žyvuć i pracujuć u Łondanie!) adkazvali, što prosta pra jaho nie viedali.
U vyniku kampanija pa vybary minskaha łahatypa pacichu pieraŭtvaryłasia ŭ kampaniju pa baraćbie z Alaksandram i Natašaj Hrand. Kiraŭnik «Svabodnaha teatru» Mikałaj Chalezin abvinavačvaŭ ich u supracy z KDB i FSB, ŚMI napieraboj źbirali amatarskija łahatypy, padkreślivajučy, što jany, maŭlaŭ, ničym nie horšyja za varyjant INSTID… Navat arhanizavałasia tak zvanaja «zbornaja Minska pa brendynhu» — šerah pradstaŭnikoŭ rekłamnych ahienctvaŭ, dyzajnieraŭ i prosta nieabyjakavych minčukoŭ, jakija pačali ŭhavorvać staličnyja ŭłady nie śpiašacca prymać varyjant Hrandaŭ ci chacia b razhledzieć alternatyvy jamu.
«My svaju pracu zrabili. Raspracavali styl Minska, łahatyp byŭ tolki častkaj jaho. Ahułam padrychtavali vialiki hajdbuk, asnovy stylu horada. Praca była pryniata, haradskija ŭłady nam jaje apłacili. Dalej hetym hajdbukam horad karystajecca jak ličyć patrebnym. Moža vykarystoŭvać, a moža i nie», — raspavioŭ «Našaj Nivie» Alaksandr Hrand.
Prykład vykarystańnia «minskaha patternu»
Daviedacca, čamu ž nie vykarystoŭvajecca apłačany brend ad INSTID, nie tak i prosta. Minski infarmacyjna-turystyčny centr kivaje na Ministerstva sporta i turyzmu. Tam paciskajuć plačyma: «Maŭlaŭ, a my pryčym? Brend Minska byŭ raspracoŭkaj infarmacyjna-turystyčnaha centra». Skončyłasia ŭsio tym, što Alena Plis, dyrektarka infarmacyjna-turystyčnaha centra, adkazała koratka: «Biez kamientaroŭ».
Na dumku samoha Alaksandra Hranda, pryčyna, čamu styl ad INSTID pakłali na palicu, — zališniaja palityzavanaść, jakuju ŭ vyniku nabyŭ prajekt.
Alaksandr Hrand. Fota - lipetskmedia.ru
«Naša rabota była praryŭnaj dla taho času. Pra jaje vielmi dobra adhukalisia ŭ Rasii, pra jaje pisali ŭ šmatlikich vydańniach, pryśviečanych dyzajnu, nas zaprašali na sustrečy i kanfierencyi. Ale ŭ Minsku była hrupa dziejačaŭ, jakija padniali ŭsie svaje suviazi i, jak mahli, palityzavali prajekt. A ŭ Biełarusi nie vielmi kamfortna z palityzacyjaj, tym bolš kali jana stanovicca takoj hučnaj. Tamu kiraŭnictva Minska i vyrašyła hetaje pytańnie spuścić na tarmazach i bolš nie padymać jaho. Ja ŭpeŭnieny, što adzinaja pryčyna hetamu — mienavita palityzacyja», — raspavioŭ «Našaj Nivie» Alaksandr Hrand.
Pa jaho słovach, za svaju pracu INSTID atrymała abiacanuju sumu, ekvivalentuju 30 tysiačam dalaraŭ. Niahledziačy na pierapracoŭki, horad ničoha nie dapłačvaŭ Hrandam. Prytym što jany raspracavali i vodar Minska, i miełodyju (jana hučyć u hetym videa).
«Zrazumiejcie, u tym prajekcie intares byŭ nie kamiercyjnym, a našym asabistym. My sami chacieli zrabić jakasna, pryhoža i cikava», — tłumačyć Hrand.
Adznačym, što siońnia supraca Minskaha infarmacyjna-turystyčnaha centra z Hrandami praciahvajecca.
Hrand kaža, što idzie praca nad «turystyčnym stylem Minska». Pa jaho słovach, heta «styl Minska, adaptavany pad turystyčny kantekst».
Prajekt taksama nie kamiercyjny i pakul nie aficyjny, padkreśliŭ Hrand. Pa jaho słovach, inicyjatyva sychodziła mienavita ad infarmacyjna-turystyčnaha centra. Styl užo hatovy, zastałasia praca nad bukletami. Ale ŭsio heta pakul nie aficyjna, na słovach, nijakich kankretnych damoŭlenaściej, sum, padpisanych papier nie isnuje, adznačyŭ Hrand.
Akramia taho, INSTID raspracavała makiet suvieniraŭ, jakija płanuje zapuścić u prodaž. Horad za ich nie płacić, heta čysta kamiercyjny prajekt ci to samoha Hranda, ci to kahości ź jaho partnioraŭ.
Praŭda, ani makietaŭ suvieniraŭ, ani napracovak turystyčnaha stylu Minska Alaksandr Hrand pakazvać nie zachacieŭ.
Raspłyvisty adkaz dali i ŭ infarmacyjna-turystyčnym centry.
Dyrektarka Alena Plis paćvierdziła, što prykładna dva hady tamu mieła razmovu na hetuju temu z Alaksandram Hrandam. Praŭda, kaža Plis, jana nikoha nie prasiła ni ab čym. Usio — pryvatnaja inicyjatyva Hrandaŭ.
«Kali štości budzie hatova, my ahučym. Budziem pakazvać i abmiarkoŭvać. Ja nie viedaju, ci robiać jany niešta i na jakim heta etapie. My nie kantralujem praces. Ale na heta hrošy nie praduhledžany. Kali štości i budzie zroblena — to biaspłatna, — zapeŭniła Alena Plis. — Nijakich damovaŭ niama, i nijakich vynikaŭ ja nie čakaju».
Idei ad INSTID jašče buduć razhladacca. Kančatkovaje rašeńnie, padkreśliła Plis, buduć prymać «ludzi nad joj».
Pa jaje słovach, kali chtości ź minčukoŭ zrobić hetuju pracu i padoryć horadu, — jaje taksama z radaściu razhledziać.
Ale što kankretna staličny infacentr maje na ŭvazie pad turystyčnym stylem Minska?
«Što takoje turystyčny styl horada? U internecie zahuhlicie i pahladzicie», — paraiła Alena Plis.
