My sustrelisia z Paŭlinaj, kab raspytać, čym novyja tvory buduć adroźnivacca ad napisanaha raniej, i adsačyć jaje šlach da muzyki.
Paŭlina Cimochina.
Ciaha da tvorčaści — ad baćkoŭ
«Maje baćki pracavali ŭ teatralnaj śfiery, tamu ja z malenstva znachodziłasia ŭ tvorčaj atmaśfiery. My žyli ŭ Hrodnie ŭ internacie, jaki dzialili z supracoŭnikami miascovaj fiłarmonii. U 90-ja hady asabliva nie było cacak, tamu dziaciej zabaŭlali chto čym moh. Mianie maci, naprykład, navučyła śpiavać hamy. U niejki dzień ja pa zvyčcy murłykała ich sabie pad nos. Susiedzi-muzyki pačuli heta i adznačyli, što ŭ mianie atrymlivajecca lepš, čym u ich vučniaŭ, skazali, što ŭ mianie jość schilnaść da muzyki. U 1995 hodzie my pierajechali ŭ Minsk, a ŭ 1997-m ja pajšła ŭ muzyčnuju škołu.
Maci i siońnia robić u Teatry lalek, a taksama zajmajecca ahučvańniem roznych filmaŭ i sieryjałaŭ. U pryvatnaści, jaje hołas hučyć u biełaruskim dublažy, jaki robicca ŭ miežach prajekta «Kinakonh».
Addała pijanina, ale nabyła kłavišy znoŭ praz dva hady
«U 11-m kłasie mnie zachaciełasia ŭsio kinuć, bo ŭ našaj sistemie adukacyi ŭmiejuć adbić žadańnie niečym zajmacca. Moj nastaŭnik, naprykład, byŭ prosta apantany pijanina, ale pry hetym nie cikaviŭsia mnoj i pavodziŭ siabie hruba: čaplaŭsia da majho adzieńnia, nie zvažaŭ na toje, što ja dva razy łamała ruku, što nie mahło nie adbicca na ŭzroŭni majoj ihry, tamu ja nie raz viartałasia z zaniatkaŭ u ślazach i saplach. Ja vielmi chutka addała svajo pijanina zusim zadarma. Pastupiła na žurnalistyku. Ale praz toje, što heta vielmi tvorčy fakultet, užo praz paŭhoda aktyŭna vystupała na ŭsialakich kapuśnikach. A jašče praź niejki čas znoŭ nabyła sabie kłavišy, na jakich i siońnia pišu muzyku — nie zmahła bieź jaje».
Luboŭ da biełaruskaj movy pryviŭ žurfak
«Mienavita na žurfaku ja napisała pieršy tekst pa-biełarusku. Sprava ŭ tym, što ŭ škole ŭ nas ničoha cikavaha pa rodnaj movie i litaratury nie było: usie zaniatki zvodzilisia da pierakazaŭ tvoraŭ. A na žurfaku ja ŭpieršyniu adkryła dla siabie cikavuju biełaruskuju litaraturu i pačuła pryhožaje maŭleńnie: šmat vykładčykaŭ u ścienach instytuta razmaŭlali mienavita pa-biełarusku».
Na prajekt Paulinn byli vydatkavanyja tysiačy dalaraŭ
«Siońnia ja pracuju z tekstami, ale nie žurnalistkaj. Chutčej, redaktarkaj, jakaja vypraŭlaje teksty inšych ludziej dla sajtaŭ. Praca patrebnaja mnie, kab zajmacca muzykaj, na jakuju sychodzić amal uvieś volny čas. Na repietycyi, pajezdki, zapis i zdymki videa syšli nie adna i navat nie dźvie tysiačy dalaraŭ. Pry hetym u Biełarusi my amal nie zarablajem: hanararny maksimum atrymlivaŭsia u kłubie TNT (niedzie kala 300-400 rubloŭ na kalektyŭ z 5 čałaviek). Ale ja ni pra što ni škaduju. My aŭtarski, nie mocna raskručany prajekt, jaki sprabuje zajmacca sapraŭdy ščyrymi rečami, ekśpierymientami ŭ hučańni.
Ciapier na chvali rep i vielmi prostyja teksty (časam — brudnyja), z prymityŭnaj muzykaj. Ja mahu padacca staroj, ale chaču stvarać niešta bolš simvaličnaje, čym u modnaj ciapier Manietački ci Fejsa, z bolš składanymi vobrazami. Kab, kali čałaviek pačuŭ maju pieśniu pa radyjo, u jaho niešta zastavałasia ŭ hałavie, nie prosta bieły šum.
Hrošy ja zarablaju ŭ inšym prajekcie — «Dafamin», dzie ŭ duecie z hitarystam my hrajem kaviery».
Novyja pieśni buduć bolš tancavalnymi
«U novy mini-albom, akramia pijana-viersii pieśni «Cicha», uvojduć bolš rytmičnyja i pazityŭnyja kampazicyi. Heta možna pabačyć pa pieršaj pieśni, jakuju my vykłali: «Ja słuchaju muzyku». Chutka ŭ siecivie źjavicca «Mnie adkažy» u duecie z Uładziem Čyžykavym. Heta ŭžo tvorčaść dla chutkich ruchaŭ, kab patupać nožkaj, tak by mović.
Akramia vypusku alboma, u bližejšaj budučyni chaciełasia b źniać klip, choć heta vielmi finansava zatratna. A jašče ja idu na kursy aranžyroŭki, kab mienš u tvorčaści zaležać ad inšych ludziej».
U treci raz płanuje padavacca na adbor na Jeŭrabačańnie
«Moj prajekt užo dva razy padavaŭ zajaŭku na ŭdzieł u Jeŭrafeście. Letaś, kali pajechaŭ Alaksiejeŭ, usio było vyrašana zahadzia, ale što zrobiš?
Udzieł u adbory — adzinaja mahčymaść dadatkova zajavić pra siabie toj aŭdytoryi, jakaja b raniej nikoli ŭ žyćci nie zazirnuła ŭ tvaju supołku va Ukantakcie. Tamu my zapisvajem novuju patencyjnuju pieśniu dla Jeŭrabačańnia».
