Pra heta paviedamiła maci Alaksandra Alena Barazienka. Źniavoleny z Pracesu 14-ci maje namier trymać haładoŭku, pakul jaho nie vyzvalać.
Čaćviora pakaranych abmiežavańniem svabody ŭ Spravie 14-ci — Alaksiej Bondar, Michaił Paškievič, Arciom Dubski i Pavał Vinahradaŭ — nakiravali staršyni Viarchoŭnaha sudu Valancinu Sukału i hieneralnamu prakuroru Ryhoru Vasileviču list, u jakim prosiać pierahledzieć svaju sudovuju spravu i vyzvalić Barazienku.
Alaksandar Barazienka byŭ źmieščany ŭ SIZA na Vaładarskaha 27 kastryčnika. Chłopiec prachodzić pa kryminalnaj spravie za mitynh pradprymalnikaŭ 10 studzienia. Heta pieršy novy palitviazień, što trapiŭ za kraty paśla admieny sankcyj Eŭrasajuzu.
Nahadajem, što taja sprava atrymała nieaficyjnuju nazvu «Praces čatyrnaccaci» pa kolkaści padsudnych. Adnak na łavie padsudnych akazałasia tolki trynaccać čałaviek. Student universytetu Ŭrocłava Alaksandar Barazienka pryniaŭ rašeńnie zastacca ŭ Polščy i nie pryjaždžać na praces. Fihuranty toj spravy atrymali roznyja terminy abmiežavańnia voli biez nakiravańnia adbyvać pakarańnia, a taksama štrafy. Andrej Kim atrymaŭ paŭtara hodu kalonii.
Bolšaść ź ich žyvie siońnia faktyčna va ŭmovach chatniaha aryštu. Niekatoryja, jak Taciana Ciškievič, Alaksiej Bondar, Arciom Dubski, pryniali rašeńnie źjechać z krainy.
Pavodle našaj infarmacyi Alaksandar Barazienka peŭny čas znachodziŭsia na terytoryi Biełarusi. Źjechać nazad na vučobu nie było mahčymaści, bo rasiejcy adnavili biełaruskuju bazu nievyjaznych. Chłopca nibyta navat zdymali ź ciahnika.
27 kastryčnika Alaksandar Barazienka dobraachvotna razam z svaim advakatam Paŭłam Sapiełkam źjavilisia da śledčaha Michalkieviča. Tam chłopcu i była pradstaŭlena pastanova ab aryšcie, jakaja była vypisana jašče ŭ traŭni.
Sudzić Barazienku mieŭ sudździa Centralnaha rajonu Jeśman — adnak A.Łukašenka abvinavaciŭ jaho ŭ karupcyi.
Sprava Barazienki maje pryncypovy charaktar: buduć sadzić i dalej za palityčnyja pierakanańni ci nie.
