Užo bolej jak sto hod adzinym varyjantam lačeńnia apiendycytu ličyłasia vydaleńnie zapalonaha orhana. I tolki ciapier chirurhi vyśvietlili, što apieracyja zusim nie abaviazkovaja — u bolšaści vypadkaŭ pacyjentu dosyć prapisać kurs antybijotykaŭ.
Ź siensacyjnaj zajavaj vystupili navukoŭcy z Univiersiteta Turku. Raniej praviedzienyja daśledavańni ŭžo aściarožna pakazvali na mahčymaść lačeńnia apiendycytu antybijotykami, adnak da ciapierašniaha času takich rekamiendacyj staralisia paźbiahać. Daktary nie mahli vyklučyć toj varyjant, što antybijotyki tolki zdymajuć vostruju formu zapaleńnia — i apieracyja ŭsio ž spatrebicca paźniej, tolki budzie ŭžo składaniejšaj.
U chodzie maštabnaha ekśpierymientu finskija navukoŭcy na praciahu piaci hadoŭ nazirali za tryma sotniami pacyjentaŭ va ŭzroście ad 18 da 60 hadoŭ, jakim było prapanavana vylečyć ničym nie ŭskładnieny apiendycyt biez chirurhičnaha ŭmiašańnia, antybijotykami.
Na praciahu troch dzion leki im stavili ŭ balnicy, unutryvienna, a zatym jašče tydzień jany prymali antybijotyki doma, u vyhladzie tabletak.
U vyniku amal dźvie traciny pacyjentaŭ vydatna abyšlisia biez apieracyi. A ŭ tych, kamu jana ŭsio-taki spatrebiłasia, vydaleńnie apiendyksa prajšło biez usialakich uskładnieńniaŭ.
A značyć, nie ŭskładnieny vostry apiendycyt treba pierš za ŭsio sprabavać lačyć mienavita antybijotykami, robiać vysnovu aŭtary daśledavańnia. Heta nijak nie pahoršyć stan pacyjenta, zatoje ź vialikaj dolaj imaviernaści moža vyratavać jaho ad niepatrebnaj apieracyi i spadarožnych ryzyk trapleńnia ŭ ranu infiekcyj.
