Astranomy z ZŠA vyjavili karlikavuju płanietu 2015 TG387 — samy daloki abjekt z zarehistravanych u Soniečnaj sistemie, pieradaje nature.com. Karlikavaja płanieta maje radyus kala 300 kiłamietraŭ.
Abjekt ŭpieršyniu ŭbačyli ŭ kastryčniku 2015 hoda. Praz toje, što adkryćcio adbyłosia niezadoŭha da Chełoŭina, a pieršasnaje abaznačeńnie abjekta ŭtrymlivała litary «TG», navukoŭcy vyrašyli nazvać novuju karlikavuju płanietu Hoblin («The Goblin»). Paśla daśledčyki nazirali jaje jašče vosiem razoŭ u 2015, 2016, 2017 i 2018 hadach. Heta dazvoliła raźličyć jaje arbitu. I akazałasia, što najbližejšy da Sonca punkt arbity Hoblina znachodzicca na adlehłaści kala 65 astranamičnych adzinak ad Sonca, a najbolš addaleny — na adlehłaści bolš za 2300 astranamičnych adzinak. Heta značyć, što Hoblin — samy addaleny ad Sonca siarod viadomych abjektaŭ Soniečnaj sistemy.
Navukoŭcy ličać, što arbita Hoblina paćviardžaje isnavańnie «Płaniety X», tearetyčna pradkazanaj u 2016 hodzie.
Isnavańniem hetaj płaniety možna było b rastłumačyć formu arbit šerahu inšych addalenych ad Sonca abjektaŭ Soniečnaj sistemy (tranśnieptunovych abjektaŭ). Masa pradkazanaj «Płaniety X» u 10 razoŭ pieravyšaje masu Ziamli, a jaje adlehłaść da Sonca źmianiajecca ad 200 da 600—1200 astranamičnych adzinak (adna astranamičnaja adzinka ≈ 150 miljonaŭ kiłamietraŭ).
