Rabotniki AAT «Niakrašynski» Akciabrskaha rajona Homielskaj vobłaści ŭ aŭtorak ranicaj nie vyjšli na pracu. Tak ludzi pratestavali suprać zvalnieńnia dyrektara haspadarki Vasila Łachanskaha. U situacyi raźbiraŭsia Tut.by.
Vasil Łachanski. Fota: «Čyrvony kastryčnik».
— Ranicaj pryjšoŭ, pakłaŭ klučy na stoł i zapłakaŭ, — raspaviadajuć pracaŭniki. Jany nie razumiejuć, za što moh być zvolnieny Vasil Piatrovič.
— Kažuć, što staršyni rajvykankama paskardzilisia dajarki: nibyta karovam nie chapaje kormu — i mienavita za heta jaho vyklikali ŭ rajvykankam. Ale heta niapraŭda, — kaža adna z rabotnic haspadarki. — Lepšaha kiraŭnika my nie bačyli. Pry im my stali atrymlivać dobruju zarpłatu. Miechanizatary majuć tysiaču rubloŭ — i ŭsich usio zadavalniała.
Ludzi nie pahadzilisia z rašeńniem vysokaha kiraŭnictva i patrabavali viarnuć dyrektara.
I, zdajecca, viarnuli. Prynamsi pra heta paviedamiŭ staršynia rajvykankama Viktar Pałujanaŭ.
— Adbyłosia nieparazumieńnie. Nichto nie zvolnieny. Adbyłasia razmova, imavierna, nas nie tak zrazumieli. Zaraz usie pracujuć, pastaŭlenyja zadačy. Usio dobra, — zapeŭniŭ kiraŭnik rajona.
Sam zvolnieny i adnoŭleny dyrektar u hutarcy z Tut.by taksama nazvaŭ situacyju nieparazumieńniem. «Mahčyma, my nie tak adzin adnaho zrazumieli», — vykazaŭ mierkavańnie Łachanski. A zatym raptam dadaŭ, što kiruje haspadarkaj užo 19 hadoŭ i 4 miesiacy — i byŭ uzrušany padtrymkaj ludziej. «Heta lepš za ŭsialaki orden», — pryznaŭsia Vasil Piatrovič.
