Palityčny ahladalnik «Kommiersanta» Dźmitryj Dryzie miarkuje, što Łukašenka šukaje novyja arhumienty ŭ vialikim torhu z Maskvoj.
Fota: kremlin.ru.
Dryzie ličyć, što abiacańnie Łukašenki razdać zbroju kožnaj siamji, žančynam i starym u vypadku maštabnaha ŭvarvańnia ŭmoŭnaha praciŭnika, a taksama sustreča z byłym prezidentam Ukrainy Viktaram Juščankam śviedčać pra toje, što Łukašenka znoŭ tarhujecca z Rasijaj:
«Jość nieaficyjny tezis — rytoryka Alaksandra Łukašenki kožny raz stanovicca bolš žorstkaj, kali ŭ jaho niešta nie tak z Maskvoj».
Žurnalist ličyć, što roznahałośsi stali zaciažnymi i chraničnymi. Na jaho dumku, biełaruski lidar nie dasiahnuŭ praryvu na sustrečach z Pucinym.
Maskvu razdražniaje palityka Łukašenki «i našym, i vašym», u pryvatnaści, jaho flirt z Zachadam i całkam siabroŭskija adnosiny z Ukrainaj. A Minsk patrabuje kredytaŭ i finansavańnia siabie jak rasijskaha rehijona, pry hetym z zachavańniem poŭnaj niezaležnaści i suvierenitetu.
Akramia taho, Biełaruś razam z Kitajem raspracavała i naładziła vytvorčaść sistem załpavaha ahniu «Pałaniez», dy jašče i pradała ich Azierbajdžanu. Ahladalnik «Kommiersanta» ličyć, što takim čynam Biełaruś skłała kankurencyju Rasii i parušyła stratehičny bałans u rehijonie.
«Ultymatum nie ŭltymatum, ale tajna ličycca, što ciarpieńnie Maskvy kančajecca»,
— piša Dryzie.
Jon ličyć, što Alaksandr Łukašenka dobra tarhujecca na miažy fołu. Za ŭsiu historyju Sajuznaj dziaržavy jon nikoli nie prajhravaŭ.
«Adnak lubaja sistema, navat dobra adładžanaja, rana ci pozna daje zboi»,
— papiaredžvaje Dryzie.
