U efiry ANT 8 kastryčnika vyjšła pieradača «Naša žyćcio», pryśviečanaja pytańniem biaśpieki. Viadučym byŭ Dźmitryj Bačkoŭ. Siarod haściej u studyi byŭ palitołah Dzianis Mieljancoŭ.
Dzianis Mieljancoŭ. Skryn z sajta ont.by.
U vynikovaj pieradačy, jakaja źjaviłasia na telekanałach nie było ničoha z taho, što Mieljancoŭ kazaŭ ab infarmacyjnych atakach na Biełaruś z boku Rasii.
«Havorka išła pra toje, što prapahanda i infarmacyjnyja dyviersii ŭ nas nie tolki z boku Zachadu i polskaha prapahandysckaha kanała «Biełsat», pra što kazaŭ viadučy i z čym ja zhodzien, a jašče i z boku našych uschodnich sajuźnikaŭ.
Uspomnim choć by fejkavuju navinu ab pierakidcy na terytoryju Biełarusi dla ŭdziełu ŭ vučeńniach Zachad-2017 padraździaleńniaŭ 1-j tankavaj armii, jakuju rasiejski Minabarony da hetaha času nie źniało z sajta, ci ŭzłom tvitar-akaŭnta namieśnika kiraŭnika Administracyi prezidenta Maksima Ryžankova, za jakim vidavočna ciahniecca rasijski parašut», — adznačyŭ Mieljancoŭ.
U kamientary «Našaj Nivie» Dzianis Mieljancoŭ adznačyŭ, što jon upieršyniu prymaŭ udzieł u pieradačy ŭ takim farmacie. U raniejšym palityčnym tok-šou, jakoje vioŭ Vadzim Hihin apošnija hady nie cenzuravalisia navat samyja žorstkija vykazvańni. Raniej na cenzuru z boku Bačkova zajaŭlaŭ lidar Partyi BNF Ryhor Kastusioŭ.
Taksama Mieljancoŭ adznačyŭ jašče adzin momant, jaki moža ŭpłyvać na abaronienaść našaj krainy:
«Nie nazyvajučy imionaŭ. Kiraŭnictva departamienta mižnarodnaha vajskovaha supracoŭnictva Minabarony — asabistyja adrasy na mail.ru, niekatoryja daradcy i kiraŭniki siektaraŭ Dziaržaŭnaha sakrataryjata Rady biaśpieki — na ramblery i mail.ru, dypłamaty pasolstva Biełarusi ŭ Vialikabrytanii — mail.ru.
Heta maleńkaja častka najaŭnych u mianie vizitak. Kraina, jakaja pretenduje na rolu «dypłamatyčnaha chaba» i «pieramoŭnaj placoŭki» pavinna trochi sačyć za sietkavaj hihijenaj svaich adkaznych asob», — adznačaje Mieljancoŭ.
