Žančyna zrabiła tabličku z vydumanymi imionami, a potym prasiła hrošy ŭ kramach u Pastavach, Hłybokim i Šarkaŭščynie. Fota: pres-słužba Śledčaha kamiteta
Sud Šarkaŭščynskaha rajona prysudziŭ 40-hadovuju žančynu da 1 hoda i 9 miesiacaŭ papraŭčych prac za zamach na machlarstva. Žančyna chłuśnioj vymańvała ŭ ludziej hrošy nibyta na apłatu pachavańnia i rytualnych tavaraŭ dla pamierłych svajakoŭ. Pra heta paviedamlaje pres-słužba suda.
Žančynu abvinavačvali ŭ tym, što ź lutaha pa sakavik jana padmanam atrymała i sprabavała atrymać hrošy i majomaść nibyta na pachavańnie i rytualnyja tavary dla pamierłych blizkich svajakoŭ. Viadoma, što žančyna pražyvała ŭ Minskaj vobłaści, ale «pracavała» ŭ susiedniaj Viciebskaj, adkul sama rodam.
Usiaho fihurantka raźličvała atrymać 800 rubloŭ ad dzieviaci čałaviek. Ale niekatoryja admovili, u vyniku kaštoŭnaściaŭ na 510 rubloŭ pazbavilisia siamiora. Paśla žančyna tak i nie kampiensavała ludziam škodu.
Źmiakčalnaj akaličnaściu sud pryznaŭ poŭnaje pryznańnie viny. Abciažvajučym staŭ toj fakt, što złačynstva było ździejśniena ŭ stanie ałkaholnaha apjanieńnia.
Žančynu pryznali vinavataj u zamachu na machlarstva i prysudzili da 1 hoda i 9 miesiacaŭ papraŭčych rabot. Akramia taho, sud vyrašyŭ prymianić prymusovyja miery biaśpieki i lačeńnia ad ałkahalizmu pa miescy žycharstva.
