Takaja kolkaść charčovych adkidaŭ maje nie tolki ekanamična niehatyŭny ŭpłyŭ, ale i stvaraje nastupstvy dla ekałohii: adkidy stvarajuć prykładna 8% vykidaŭ parnikovych hazaŭ.
I kali vy dumajecie, što svaimi pavodzinami vy nie ŭ stanie štości źmianić, to voś vam jašče adna cikavaja ličba. Šmat chto dumaje, što bolšaja častka adkidaŭ nazapašvajecca da taho, jak pradukty traplajuć da spažyŭca (na składach, u kramach, u restaranach). Ale, naprykład, u ZŠA 50% charčovych adkidaŭ źjaŭlajucca mienavita na ŭzroŭni siamji. Na žal, u mianie niama ličbaŭ pa Biełarusi, i spadziajusia, što ŭzrovień adkidaŭ u nas nie taki vysoki, ale ŭ našych rukach zrabić tak, kab ich było jašče mienš.
Fota: Shutterstock/Nick Hawkes.
Nižej vy znojdziecie niekalki paradaŭ, jak źmienšyć charčovyja adkidy. Nasamreč, u hetym niama ničoha składanaha, usiaho tolki patrebny peŭnaja dola płanavańnia, kantrolu i fantazii. Niekatoryja z paradaŭ mohuć padacca vam vidavočnymi, i ja budu tolki rada, kali vy i bieź mianie ŭśviadomlena kirujeciesia hetymi praviłami. Ale spadziajusia, što štości novaje vy taksama tut znojdziecie i zachočacie źmianić svaje zvyčki.
Płanavańnie i kantrol — zakład pośpiechu (składana vykinuć toje, što vy nie nabyli)
- Płanujcie svoj racyjon na tydzień, składajcie śpis pakupak. I paźbiahajcie pachodaŭ u kramu na pusty straŭnik. Kali vy hałodny, imaviernaść pakupki niepatrebnych vam praduktaŭ pavialičvajecca ŭ razy.
- Pasprabujcie chacia b ciaham miesiaca zapisvać tyja pradukty, što vy vykinuli. Tak vy zmožacie praanalizavać svajo spažyvańnie i, naprykład, pierajści na mienšyja pakunki.
- Raz na miesiac pravodźcie invientaryzacyju svaich zapasaŭ: vy zmožacie zrazumieć, jakija pradukty ŭ vas užo jość i sačyć za terminam ich prydatnaści.
Ale kali ŭ vas užo jość pradukty i vy ŭśviedamlajecie, što nie paśpiejecie ŭsio užyć da taho, jak jany sapsujucca, na dapamohu prychodzić marazilnaja kamiera.
Fota: liebherr.com.
Zrazumieła, što nie ŭsie pradukty možna zamarozić, ale śpis taho, što doŭha pražyvie ŭ choładzie, pry hetym nie straciŭšy svaje spažyvieckich jakaściaŭ, dastatkova vialiki.
- Ja asabista marožu šmat harodniny (piercy, fasola, harošak, tamaty, brokali i hetak dalej), jahady i piure ź ich, zielaninu. Kali ja baču, što nie paśpieju pryhatavać štości sa śviežaha, to lepiej zamarožu i skarystajusia potym, čym vykinu z hnillu.
- Kali ŭ vas zastalisia białki paśla vypiakańnia z žaŭtkami, taksama možacie zachavać ich u maraziłcy.
- U maraziłcy možna zachoŭvać navat chleb, kab jaho nie sapsavała ćvil. Ja narazaju chleb na łusty (ci kuplaju tostavy) i častku, jakuju ja nie źjem u najbližejšyja dni, adpraŭlaju ŭ maraziłku. Kali mnie patrebny kavałačak chleba, prosta dastaju jaho i kidaju ŭ tostar (možna dla razmarozki ŭžyvać duchoŭku ci mikrachvaloŭku).
Pamiatajcie, što ŭ maraziłcy taksama nielha zachoŭvać pradukty biaskonca: pierad tym, jak zakinuć niešta ŭ ladoŭniu, naklejcie na pakiet ci kantejnier stykier z dataj, kab mieć mahčymaść prakantralavać termin prydatnaści.
Fota: healthline.com.
Nu, i kali vy ŭžo niešta pryhatavali, ale vam nadakučyła heta jeści, zaŭsiody možna padklučyć fantaziju i pieratvaryć reštki stravy ŭ štości inšaje.
- Z bulbianoha piure možna zrabić bitočki, z varanaha rysu — fraj rys ź jajkam.
- Niekatoryja pradukty na nastupny dzień paśla skančeńnia terminu prydatnaści jašče možna skarystać. Naprykład, «učorašni» tvaroh možna ŭziać dla syrnikaŭ ci zapiakanak. Z krychu skisłaha małaka možna pryhatavać aładki.
U lubym vypadku nie treba sychodzić u krajnaść i vykarystoŭvać pradukty, jakija pa usich pakazčykach užo sapsavalisia i mohuć nanieści škodu vašamu arhanizmu. Budźcie zdarovyja i ješcie smačna!