Z 19 listapada štodnia moładzievyja aktyvisty źbirajucca a 7‑j viečara kala budynku śledčaha izalataru, dzie ŭtrymlivajuć apošniaha z palitviaźniaŭ Alaksandra Barazienku. Jaho vinavaciać u arhanizacyi masavych nieparadkaŭ, jakija nibyta mieli miesca padčas studzieńskich akcyjaŭ pratestu pradprymalnikaŭ.
Moładzievyja aktyvisty zajavili, što buduć kožny dzień źbiracca na vulicy Vaładarskaha kala budynku śledčaha izalataru na znak salidarnaści z Alaksandram Barazienkam.
Nahadajem: Alaksandra Barazienku trymajuć pad vartaj ad 27 kastryčnika. Jon apošni fihurant u «spravie 14‑ci». Kali sudzili spačatku dziesiać, a potym jašče troch abvinavačanych, jon vučyŭsia ŭ ramkach prahramy Kastusia Kalinoŭskaha va Ŭrocłaŭskim universytecie. Barazienka sam pryjšoŭ da śledčaha, a toj paśla dopytu aryštavaŭ chłopca.
Adrazu paśla aryštu Alaksandra ŭ Pinsku, dzie žyvuć jahonyja baćki, i ŭ inšych haradoch prajšli pikiety z patrabavańniem vyzvalić palitviaźnia da sudu.
19 listapada adbyłasia pieršaja akcyja mienavita kala mienskaha śledčaha izalataru. Milicyjanty ŭ pieršyja ž chviliny zatrymlivali moładzievych aktyvistaŭ i advozili ich u milicyju Maskoŭskaha rajonu.
«Na apošnich akcyjach milicyjantaŭ amal nie było. Nas nie zabirajuć. Liču, što heta pieramoha salidarnaści.My dakazali svaju moc», — havoryć aktyvistka kampanii «Eŭrapiejskaja Biełaruś» Palina Dźjakava.
Paplečnika Paliny Maksima Viniarskaha taksama dvojčy zatrymlivali ciaham tydnia:
«Ułady zrazumieli, što banalnym ciahańniem u RUUS z nami ničoha zrabić nia vyjdzie, a na niešta bolšaje jany pakul što nia ličać siabie hatovymi. Pierastali vykazvać svaju niepavahu supracoŭniki izalataru.
U nas štodnia pytajucca ludzi: «A chto heta?». Heta nia tolki sposab padtrymać Alaksandra Barazienku, heta jašče j sposab raspaŭsiudzić infarmacyju ab tym, što ŭ nas jość palitźniavolenyja. Za ŭvieś čas u nas nie było nivodnaha vypadku, kab była, naprykład, niejkaja ahresija z boku tych, chto prachodziŭ mima».
Aktyvistka niezarehistravanaj arhanizacyi «Małady front» Taciana Šapućka ličyć, što ŭłady vyrašyli źmianić taktyku:
«Ja liču, što ŭłady vyrašyli źmianić taktyku. Toje, što ŭ apošnija dni aktyvistaŭ, jakija źbirajucca kala Vaładarki, nie razhaniajuć — heta nijakaja nie prajava liberalizmu.
Bo, kali vychodziać i niašmat ludziej, a ich zatrymlivajuć i na niekalki hadzinaŭ advoziać u milicyju, adrazu ŭva ŭsich niezaležnych ŚMI źjaŭlajecca pra heta infarmacyja. Pra heta daviedvajucca ludzi, nie zaanhažavanyja ŭ palitycy. Ja dumaju, što ŭłady bolš nie zatrymlivajuć moładzievych aktyvistaŭ, bo im nie patrebny šyroki rozhałas».
Sud nad Alaksandram Barazienkam pryznačany na 8 śniežnia. Moładzievyja aktyvisty zapeŭnili, što da taho času, pakul Alaksandr nia vyjdzie na volu, štodnia a 7‑j viečara buduć adbyvacca vuličnyja akcyi salidarnaści.