Kolišni pasoł Polščy ŭ Biełarusi Lešek Šarepka adkazaŭ na svajoj staroncy ŭ fejsbuku na zajavu Alaksandra Łukašenki, zaznačaje Radyjo Svaboda.
Kiraŭnik krainy zajaviŭ u niadzielu pra mahčymuju reakcyju Biełarusi i Rasiei na amerykanskuju vajskovuju bazu ŭ Polščy.
Łukašenka: Nie treba Polščy stvarać lišnija bazy, bo my z rasijanami taksama budziem vymušanyja niešta raźmiaščać
«Ja ministru zamiežnych spravaŭ skazaŭ — jon vystupaŭ u nas u Miensku: my z vami vajavać nie źbirajemsia. Tamu nia treba stvarać lišnija bazy. U advarotnym vypadku my z rasiejcami pavinny budziem adkazvać. Značyć, my budziem vymušanyja niešta raźmiaščać, kab vam procidziejničać», — zajaviŭ kiraŭnik dziaržavy na sustrečy z žycharami pasiołka Bałbasava.
Lešek Šarepka adkazaŭ na heta ŭ svaim Fejsbuku:
«Šanoŭny Alaksandar Ryhoravič, u nas niama lišnich bazaŭ, zatoje nie chapaje patrebnych. Kali rasiejskija žaŭniery vyjduć z Hruzii, Ukrainy, a taksama ź Biełarusi, tady možna budzie tarhavacca. A pakul heta ŭ vas jość nahoda tarhavacca z Maskvoj za bolšyja datacyi», — napisaŭ Šerepka.
Lešek Šarepka pracavaŭ ambasadaram u Miensku ŭ 2011-2015 hh. U kryzisny čas biełaruskija ŭłady «paprasili» jaho pakinuć Biełaruś. Šarepka vymušany byŭ źjechać z krainy razam z Majraj Moraj — kiraŭnicaj pradstaŭnictva Eŭraźviazu ŭ Biełarusi. Paśla taho jak sytuacyja stała spakajniejšaja, ambasadar viarnuŭsia ŭ Biełaruś.
