Pierachod 22‑hadovaha forvarda «Saturna» i zbornaj Biełarusi ź lvoŭskich «Karpataŭ» u ramienski «Saturn» u studzieni 2008 hodu pryznany niesapraŭdnym.
Pałata pa vyrašeńni sprečak FIFA pastanaviła,što ŭ futbalista jość dziejučy kantrakt z ukrainskim klubam, jaki skančajecca ažno 31 śniežnia 2011 h.
U najbližejšy čas kiraŭnictva «Karpataŭ» prakansultujecca ź jurystami FFU, a taksama z prezydentam «Barusii» Rajnchardam Raubalem, jaki abaraniaje intaresy ukrainskaha kluba ŭ FIFA. Paśla čaho budzie pryniata rašeńnie nakont losu biełarusa, paviedamlaje Sport‑Ekspriess sa spasyłkaj na aficyjny sajt lvavianaŭ.
***
Uradženiec Smurhoniaŭ Leanid Koviel niekalki sezonaŭ pravioŭ za mienskaje «Dynama». U 2006 h. zaklučyŭ kantrakt ź lvoŭskimi «Karpatami», za jakija zhulaŭ 29 matčaŭ dy zabiŭ 12 miačoŭ.
Zimoj 2007\2008 dla mnohich niečakana zaklučyŭ kantrakt z «Saturnam». Kiraŭnictva «Karpataŭ» dakazvała, što niezadoŭha da hetaha Leanid padoŭžyŭ kantrakt ź lvoŭskim klubam.
Koviel dakazvaŭ, što podpis nie jahony, maŭlaŭ, u toj dzień jon byŭ u Biełarusi, a nie ŭ Lvovie. Dy pastajanna kazaŭ u interviju, što kiraŭnictva «Karpataŭ» – strašnyja ludzi.
Urešcie źjechaŭ tady ŭ Ramienskaje. Zdavałasia, jak kažuć u narodzie, Kovielu ŭdałosia i na jełku ŭskaraskacca, i portki nie parvać.
Što praŭda, debiutavaŭ tolki 30 lipienia 2008 hodu ŭ matčy z «Kryłami Savietami». Navat zabiŭ hoł, ale toj nia byŭ zaličany. Zhulaŭ u čempijanacie Rasiei 13 matčaŭ (848 chvilin). Miačoŭ bolš nie zabivaŭ, tolki adzin u Kubku Intertota luksemburskaj «Etcele» dy dva za moładzievy skład «Saturnu».
***
Kali infarmacyja FK «Karpaty» praŭdzivaja ‑‑ časam klub vydavaŭ žadanaje za sapraŭdnaje — to Leanidu pahražaje dyskvalifikacyja.